विवाहितेवर बलात्कार; तिघांना अटक

कर्जत : प्रतिनिधी

एका विवाहित महिलेला पळवून नेऊन त्यांच्यावर बलात्कार करणार्‍या नराधमास व त्याला सहकार्य करणार्‍या दोन साथिदारांना कर्जत पोलिसांनी अटक केली आहे. वकील, दोन पोलीस पाटील यांनी दिलेल्या माहितीनंतर अवघ्या दीड तासात त्या महिलेला शोधण्यात कर्जत पोलिसांना यश आले.

उरण तालुक्यातील जसखार येथील पीडित महिला आपल्या छोट्या मुलाला भेटायला खालापूर तालुक्यातील मानकीवली येथे अधूनमधून येत असते. अशीच ती 2 मे रोजी कर्जत रेल्वे स्थानकाच्या शेजारी आली. भूक लागली म्हणून ती स्टेशनच्या बाजूला असलेल्या चायनीज हॉटेलमध्ये राईस खात बसली होती. त्या वेळी तिच्या बाजूला एक इसम येऊन बसला. तिने त्याच्या हातातील मोबाईल घेतला व एक नंबर डायल केला. थोड्या वेळाने तिचा पती मोटारसायकल घेऊन आला. ती महिला पतीच्या गाडीवर बसून मानकीवली येथे निघून गेली. त्या महिलेच्या मोबाईलवर मात्र त्यानंतर सारखे फोन येऊ लागले होते.

10 मे रोजी जसखारवरून मानकीवली येथे जाण्यासाठी ती महिला व त्याचे पती कर्जत येथील भिसेगाव रिक्षा स्टँड येथे आले. तिथून रेल्वे स्थानकावर जाण्यासाठी निघाले असता तो इसम त्या महिलेला म्हणाला, माझा फोन का उचलत नाहीस. तुला मारून टाकेन माझे नाव सूरज आहे. इकडे माझ्या नादी कोणी लागत नाही. तेव्हा त्या महिलेला कळलं मला वारंवार फोन करणारा हाच तो इसम आहे. रात्री 10.40 च्या ट्रेनने कर्जतवरून ती महिला व तिचा पती हे खोपोलीला जायला निघाले. ते ट्रेनमध्ये बसले त्याच वेळी हा सूरज त्याचा जोडीदार चालत्या ट्रेनमध्ये त्या डब्यात चढले. ट्रेन सुरू झाल्यावर सूरज व त्याचा जोडीदार महिलेच्या पतीला मारहाण करू लागले. दरम्यान, पळसदरी रेल्वे स्टेशनवर ट्रेन थांबली असता महिलेला त्या दोघांनी फलाटावर ढकलून दिले. त्या वेळी सूरजसुद्धा उतरला, मात्र त्याच्या जोडोदाराने महिलेच्या पतीला फलाटावर उतरण्यास मज्जाव केला. ट्रेन सुरू झाल्यावर मात्र त्याने चालती ट्रेन सोडली.

पळसदरी रेल्वे स्थानकातून महिलेला सुरजने हाताला धरून खेचत बाहेर नेले. रेल्वेस्थानकाच्या बाहेर एक मुलगा मोटारसायकल घेऊन उभा होता. त्या मोटारसायकलवर तिघांनी महिलेला घेऊन गेले. वेताळ मंदिराच्या डोंगरावर नेऊन सुरजने महिलेवर बलात्कार केला. त्यानंतर तिला पुन्हा मोटारसायकलवर बसवून त्याने कर्जतकडे आणले. अशी तक्रार पीडित महिलेने कर्जत पोलीस ठाण्यात दिली आहे.

दरम्यान, पत्नीला पळवून नेल्यावर पती केळवली स्थानकावर उतरला. त्या वेळी केळवली येथून घरी निघालेले अ‍ॅड. राजेंद्र येरुणकर यांना त्या पीडित महिलेचा पती दिसला. त्यांनी विचारणा केली असता, त्याने झालेला प्रकार त्यांना सांगितला. त्या वेळी येरुणकर यांनी पळसदरीच्या पोलीस पाटील विनया खोपकर-निगुडकर यांना फोन केला. पोलीस पाटील निगुडकर यांनी तातडीने कर्जत पोलीस ठाण्याच्या वरिष्ठ पोलीस निरीक्षक सुजाता तानवडे यांना रात्री 12 च्या सुमारास फोन करून घटनेची माहिती दिली. नाईट राऊंडला असलेल्या पोलीस निरीक्षक तानवडे यांनी दोन कर्मचार्‍यांच्या चार टीम तयार करून पीडित महिलेचा शोधण्यास सुरुवात केली. या वेळी पोलीस कर्मचार्‍यांच्या समवेत अ‍ॅड. येरूणकर, भिसेगाव पोलीस पाटील संजय हजारे होते. अवघ्या दीड तासात पोलिसांना पीडित महिलेचा शोध घेण्यात यश आले. पोलिसांनी त्या तिघां आरोपींना रात्रीच ताब्यात घेतले.

पीडित महिलेच्या तक्रारीनुसार पोलिसांनी सूरज अमरदिप चव्हाण (रा. भिसेगाव), अजय प्रताप राठोड (रा. क्रांती नगर झोपडपट्टी), बबलू अशोक सिंग (रा. पुलाची वाडी-किरवली) यांच्या विरोधात कर्जत पोलीस ठाण्यात गुन्हा दाखल केला आहे. पुढील तपास वरिष्ठ पोलीस निरीक्षक सुजाता तानवडे करीत आहेत.