पनवेलच्या शिवकरमध्ये विकासाचे महापर्व; दोन कोटी 82 लाख रुपयांची विविध कामे

आमदार प्रशांत ठाकूर व तालुकाध्यक्ष अरुणशेठ भगत यांच्या हस्ते भूमिपूजन

पनवेल ः रामप्रहर वृत्त
शिवकर ग्रामपंचायतीमध्ये करण्यात येणार्‍या तब्बल दोन कोटी 82 लाख 67 हजार रुपयांच्या 10 विकासकामांचे भूमिपूजन पनवेल विधानसभा मतदारसंघाचे कार्यसम्राट व लोकप्रिय आमदार प्रशांत ठाकूर आणि भाजपचे तालुकाध्यक्ष अरुणशेठ भगत यांच्या हस्ते रविवारी (दि. 19) भूमिपूजन करण्यात आले. आमदार प्रशांत ठाकूर यांचा स्थानिक विकास निधी, 25:15, अल्पसंख्याकबहुल ग्रामीण समाज विकास आणि भारतरत्न डॉ. बाबासाहेब आंबेडकर सामाजिक विकास योजनेचा निधी उपलब्ध करण्यात आला आहे.
या कार्यक्रमास भाजपचे तालुका सरचिटणीस व माजी जिल्हा परिषद सदस्य राजेंद्र पाटील, तालुका सरचिटणीस व माजी पंचायत समिती सदस्य भूपेंद्र पाटील, मागासवर्गीय सेलचे जिल्हाध्यक्ष व माजी जिल्हा परिषद सदस्य अमित जाधव, नेरे विभागीय अध्यक्ष सुनील पाटील, पळस्पे विभागीय अध्यक्ष अनेश ढवळे, विचुंबे सरपंच प्रमोद भिंगारकर, सदस्य अविनाश गायकवाड, सुकापूर उपसरपंच महेश पाटील, शिवकर ग्रामपंचायत सरपंच आनंद ढवळे, उपसरपंच रवींद्र ढवळ, माजी उपसरपंच प्रांजल ढवळे, सदस्य मंगेश ढवळे, रितू पाटील, सुरेखा टोपले, रेश्मा पाटील, मनिषा पाटील, मोनिका पोपेटा, संतोष मते, भास्कर पाटील, शंकर महाराज, भरत टोपले, भरत चौधरी, तुकाराम तुपे, बबन ढवळे, गोटीराम ढवळे, गोपीनाथ ढवळे, नजिर शेख, खलील शेख, रमजान शेख, सय्यद शेख, परशुराम ढवळे, अविनाश ढवळे, अरविंद फडके, प्रवीण फडके, सागर ढवळे, अरविंद माळी, निलेश महाराज, समीर पोपेटा, उत्तम पाटील यांच्यासह ग्रामस्थ मोठ्या संख्येने उपस्थित होते. दरम्यान आमदार प्रशांत ठाकूर, तालुकाध्यक्ष अरुणशेठ भगत यांच्यासह उपस्थित मान्यवरांनी बुद्ध विहारात भारतीय घटनेचे शिल्पकार डॉ. बाबासाहेब आंबेडकर आणि तथागत गौतम बुद्ध यांच्या पुतळ्यास पुष्पमाला अर्पण करून अभिवादन केले.
शिवकर ग्रामपंचातीमध्ये या विकासकामांतून गावाचा अधिक विकास साधता येणार आहे. त्यामुळे सरपंच आनंद ढवळे आणि त्यांच्या सहकार्‍यांचे आमदार प्रशांत ठाकूर यांनी कौतुक केले. त्याचप्रमाणे शहरांसोबत गावांनाही सुविधा मिळाल्या पाहिजेत यासाठी कटिबद्ध असल्याचे त्यांनी नमूद केले.
शिवकर ग्रामपंचायत अंतर्गत घनकचरा प्रकल्प तयार करणे (18 लाख रुपये), शिवकर येथे अंतर्गत भूमिगत गटार तयार करणे (आठ लाख रुपये), वसंत ढवळे चाळ ते दिक्षा बिल्डिंगपर्यंत रस्ता काँक्रीटीकरण व गटार बांधकाम करणे (10 लाख रुपये), सखाराम ढवळे यांचे घर ते प्रदीप कांबळे याच्या घरापर्यंत रस्ते व गटारे पेव्हर ब्लॉक व भूमिगत विद्युत वाहिनी टाकणे (एक कोटी 30 लाख रुपये), बुद्ध विहारचे सुशोभीकरण करणे (आठ लाख रुपये), पंतप्रधान नरेंद्र मोदी यांच्या संकल्पनेतून केंद्र सरकार पुरस्कृत जलजीवन मिशन अंतर्गत हर घर जल हर घर नल अभियान अंतर्गत शिवकर गावात नवीन पाण्याची टाकी बांधणे (30 लाख रुपये), मुस्लिम कब्रस्थानाला संरक्षण भिंत बांधणे व सुशोभीकरण करणे (35 लाख रुपये), बौद्ध स्मशानभूमीला संरक्षण भिंत बांधून सुशोभीकरण करणे (20 लाख रुपये), नवीन स्मशानभूमी बांधणे (20 लाख रुपये) आणि व्यायाम शाळेजवळ शौचालय बांधणे (तीन लाख 67 हजार रुपये) अशा 10 विकासकामांसाठी एकूण दोन कोटी 82 लाख 67 हजार रुपये खर्च करण्यात येणार आहेत. यासाठी आमदार प्रशांत ठाकूर यांनी त्यांचा स्थानिक विकास निधीबरोबरच 25:15, भारतरत्न डॉ. बाबासाहेब आंबेडकर सामाजिक विकास आणि अल्पसंख्याकबहुल ग्रामीण समाज विकास निधीची तरतूद केली आहे.
या वेळी सरपंच आनंद ढवळे यांनी आमदार प्रशांत ठाकूर यांनी नेहमीच शिवकर ग्रामपंचायतीच्या विकासासाठी निधी देत या गावाचा विकास साधला असल्याचे नमूद केले आणि आमदार प्रशांत ठाकूर व तालुकाध्यक्ष अरुणशेठ भगत यांचे आभार व्यक्त करत त्यांना धन्यवाद दिले.