आमदार आपल्या दारी उपक्रमाचे तळोजात नागरिकांकडून स्वागत

पनवेल ः रामप्रहर वृत्त
तळोजा फेज 1मध्ये आमदार प्रशांत ठाकूर यांच्या संकल्पनेनुसार आमदार आपल्या दारी हा उपक्रम रविवारी (दि. 19) झाला. या उपक्रमाचे नागरिकांनी स्वागत करत समाधान व्यक्त केले.
या वेळी आमदार प्रशांत ठाकूर यांनी तळोजा परिसरातील नागरिकांच्या सर्व समस्या जाणून त्यांचे निराकरण करणार असल्याची ग्वाही दिली.
येत्या तीन महिन्यांनंतर पुन्हा एकदा या सर्व विषयांवर आढावा घेतला जाणार असून पुढील एक महिन्याच्या आत या सर्व समस्या सोडवण्यासाठी पाठपुरावा सुरू करून नागरिकांना विविध सुविधा उपलब्ध करून देणार असल्याचे आमदार प्रशांत ठाकूर यांनी सांगितले. त्याचबरोबर नागरिकांच्या सुरक्षेचा प्रश्न भाजपचे पदाधिकारी पुढाकार घेऊन सोडवतील, असेही त्यांनी नागरिकांना आश्वासित केले.
पनवेल महापालिका आणि शासनाशी संबंधित असलेल्या विविध समस्या जाणून त्यांचे निराकरण करण्यासाठी आमदार आपल्या दारी हा उपक्रम राबविण्यात येत आहे. त्यानुसार तळोजा परिसरातील नागरिकांच्या समस्या जाणून घेण्यासाठी तळोजा फेज 1 सेक्टर 9मधील उद्यानात आमदार आपल्या दारी हा कार्यक्रम झाला. या वेळी नागरिकांनी सुरक्षा, पाणीटंचाई, नदी प्रदूषण, डेब्रिज, स्ट्रीट लाइट, बस डेपो, हवा प्रदूषण, क्रिकेट ग्राऊंड, रस्ते, भाजी मार्केट, गार्डन, रस्त्यांवरील खड्डे, प्रॉपर्टी टॅक्स, साफसफाई, सबवे मेंटनन्स, स्पीड ब्रेकर, पाणीपुरवठा, पब्लिक हेल्थ सेंटर यासह विविध विषय मांडले. या सर्व समस्या लवकरात लवकर सोडवण्यासाठी पाठपुरावा करणार असून तीन महिन्यांनंतर याबाबत पुन्हा एकदा आढावा घेणार असल्याचे आमदार प्रशांत ठाकूर म्हणाले. प्रत्येक महिन्यात एका शहरात आमदार आपल्या दारी हा उपक्रम राबवण्यात येणार असून लेखी स्वरूपात ज्यांनी प्रश्न विचारला आहे, त्यांना 10 दिवसांमध्ये उत्तर देणार असल्याची माहिती त्यांनी दिली.
एकूणच नागरिकांच्या समस्या आणि सूचनांचा विचार करून त्यांना योग्य ते सहकार्य आणि त्यांच्या प्रश्नांची सोडवणूक करण्याची ग्वाही आमदार प्रशांत ठाकूर यांनी दिली. त्यामुळे या उपक्रमाचा नागरिकांनी स्वागत करत समाधान व्यक्त केले.
या वेळी भाजपचे पनवेल तालुका अध्यक्ष अरुणशेठ भगत, सरचिटणीस प्रल्हाद केणी, माजी नगरसेवक हरेश केणी, पापा पटेल, सरचिटणीस भूपेंद्र पाटील, निर्दोश केणी, संतोष पाटील, शिवकर ग्रामपंचायतीचे सरपंच आनंद ढवळे, महिला मोर्चाच्या आशा बोसरे, अ‍ॅड. चेतन जाधव यांच्यासह पदाधिकारी, कार्यकर्ते आणि नागरिक उपस्थित होते.