रिलायन्सकडून साई मंदिराला सुरक्षा साहित्य दान

शिर्डी ः प्रतिनिधी

आघाडीचा उद्योग समूह अशी ओळख असलेल्या ‘रिलायन्स ग्रुप’तर्फे शिर्डीच्या साई मंदिराला एक कोटी 17 लाखांच्या सुरक्षा साहित्याची देणगी देण्यात आली आहे. यामध्ये एक्स रे बॅग स्कॅनर, डोअर फ्रेम मेटल डिटेक्टर, हॅण्ड हेल्ड मेटल डिटेक्टर, वॉकी-टॉकी कंट्रोलर या सुरक्षा साहित्यांचा समावेश आहे. उद्योगपती मुकेश व नीता अंबानी साईभक्त असून, ते नियमित शिर्डीला साईदर्शनासाठी येतात. शिर्डीत साई मंदिराच्या दर्शनास देश-विदेशातूनही लाखो भाविक येतात. वाढत्या गर्दीमुळे भाविकांच्या सुरक्षेची देखभाल करणे महत्त्वाचे आहे. साई संस्थान आतापर्यंत एका खाजगी सुरक्षा कंपनीकडून भाडेतत्त्वावर सुरक्षा साहित्य घेत होते. यासाठी महिन्याकाठी पाच लाखांचा खर्च येत होता, मात्र रिलायन्स उद्योग समूहाने एक कोटी 17 लाख सहा हजार 780 रुपये किमतीचे सुरक्षा साहित्य देणगी स्वरूपात दिले आहे, अशी माहिती साई संस्थानचे मुख्य कार्यकारी अधिकारी दीपक मुगळीकर यांनी दिली. या सुरक्षा साहित्यात चार नग एक्स रे बॅग स्कॅनर, 15 नग डोअर फ्रेम मेटल डिटेक्टर, 40 हॅण्ड होल्ड मेटल डिटेक्टर, एक नग वॉकी-टॉकी कंट्रोलर, 75 नग वॉकी-टॉकी (हॅण्ड हेल्डे ट्रान्स रिसिव्हर) आणि 75 वॉकी-टॉकी अतिरिक्त बॅटर्‍या असा मोठा सुरक्षा साहित्य पुरवठा केला आहे, असे दीपक मुगळीकर यांनी सांगितले. रिलायन्सकडून चार नग एक्सर रे बॅग स्कॅनर संस्थानाला उपलब्ध झाले असून, उर्वरित साहित्य लवकरच प्राप्त होईल, असेही ते म्हणाले.