फसवणूक करणारे सातजण गजाआड

बनावट कागदपत्रे बनवून 4 कोटी 10 लाखांच्या फसवणुकीप्रकरणी अटक

पनवेल शहर पोलिसांची कामगिरी

पनवेल : वार्ताहर

बनावट कागदपत्रे, शिक्के, लेटर पॅड, खोट्या सह्या, बनावट चेक याद्वारे कंपनीच्या खात्यातून चार कोटी 10 लाख रुपयांची फसवणूक करणार्‍या सातजणांना पनवेल शहर पोलिसांनी बेड्या ठोकल्या असून एका आरोपीचा शोध सुरू आहे.

आयसीआयसीआय बँक शााखा पनवेल येथे एका अनोळखी व्यक्तीने हर्बल लाईफ इंटरनॅशनल इंडिया प्रा. लि. या कंपनीचे बनावट लेटरहेड बनवून त्यावर कंपनीचा रबरी शिक्का मारुन खोट्या सह्या करून नमूद कंपनीच्या नावे बँकेत असलेल्या खात्यांचा मोबाईल क्रमांक बदली करण्याासाठी लेटरहेड बँकेत दिले. तसेच बनावट चेकद्वारे नमूद कंपनीच्या खात्यात असलेली चार कोटी 10 लाख रुपये आर. के. एंटरप्रायझेस यांच्या इंडसइंड बँकेतील खात्यात वर्ग करून बँकेची एकूण चार कोटी 10 लाख रुपयांची फसवणूक केल्याची तक्रार पनवेल शहर पोलीस ठाण्यात करण्यात आली.

या मुळे नवी मुंबईचे पोलीस आयुक्त संजय कुमार, सहाय्यक पोलीस आयुक्त राजकुमार व्हटकर व पोलीस उपायुक्त अशोक दुधे यांच्या मार्गदर्शनाखाली या गुन्हेगारांचा शोध वरिष्ठ पोलीस निरीक्षक अजयकुमार लांडगे यांच्यासह सहाय्यक पोलीस निरीक्षक निलेश राजपूत, ईशान खरोटे, पोलीस हवालदार दिलीप चौधरी, पोलीस नाईक पंकज पवार, दिनेश जोशी, अजय कदम, राहूल साळुंखे, केशव शिंदे हे करीत असताना या गुन्ह्यामध्ये या बँकेतील एक कर्मचारी या घटनेत सहभागी असल्याचे पोलिसांच्या निदर्शनास आल्याने त्याला ताब्यात घेेऊन त्याची अधिक चौकशी केली असता त्याने बँकेतील कंपनीच्या खात्याबाबत सर्व गोपनीय माहिती मित्राला दिली. मित्राने ती माहिती आराफत हनिफ शेख (33, वकील) याला दिली व त्याने ही माहिती रामकिशन लुलारकनाथ पांडे (51, एक्सपोर्ट), अमिताभ ओरोविदो मित्रा (61, कन्सल्टंट), विनोद मधुकर भोसले (44, कन्स्ट्रक्शन), जावेद हबीब अहेमद कुरेशी (55), श्रीजील मोहनन कुरपम्बील (39, व्यवसाय) व आयसीआयसीआय बँक जुनी पनवेल शाखा सेल्स मॅनेजर मुकेश लक्ष्मणप्रसाद गुप्ता (45) आदींनी संगनमत करून ही रक्कम ट्रान्सफर करीत असताना त्यांना पकडण्यात आले आहे. यातील एक आरोपी अजून फरार असून त्याचा शोध पनवेल शहर पोलीस करीत आहेत. दरम्यान, हे सर्व आरोपी उच्च शिक्षित असून काही पेशाने वकील, बँकेत मॅनेजर, व्यावसायिक तर एक आरोपी हा खुनाच्या गुन्ह्यात अटक झालेला आहे. यापूर्वी सुद्धा आराफत हनिफ शेख याने वाशी येथील बँकेमध्ये अशाच प्रकारे फसवणुकीचा गुन्हा केला होता व तो सफल झाला नाही.