मास्कविक्रीच्या बहाण्याने फसवणूक

पनवेल : बातमीदार – कोरोनाचा संसर्ग होऊ नये, यासाठी वापरण्यात येणारे मास्क व इतर वैयक्तिक सुरक्षा उपकरणांच्या मागणीत वाढ झाल्याची संधी साधून या वस्तूंच्या विक्रीच्या बहाण्याने टोळीने ऑनलाइन फसवणूक केल्याचा प्रकार समोर आला.

या टोळीने देशभरातील विविध सरकारी व खासगी रुग्णालयांची फसवणूक केल्याचे उघडकीस आले. एन-95 मास्क व वैयक्तिक सुरक्षा उपकरणांचे उत्पादन करणार्‍या तळोजा एमआयडीसीतील कंपनीच्या नावाने ही फसवणूक सुरू केल्याचे आढळून आले. त्यामुळे तळोजा पोलिसांनी या टोळीचा माग काढण्यास सुरुवात केली. या टोळीने अशाच पद्धतीने देशभरातील अनेक सरकारी व खासगी रुग्णालयांची फसवणूक केली असण्याची शक्यता व्यक्त करण्यात येत आहे.

कोरोना विषाणूचा संसर्ग रोखण्यासाठी नागरिकांनी मास्क व इतर वैयक्तिक सुरक्षा उपकरणांचा वापर करण्याच्या सूचना सरकारकडून करण्यात आल्या. त्यामुळे संपूर्ण देशात सरकारी व खासगी रुग्णालये तसेच नागरिकांमधून एन-95 मास्कसह सॅनिटायझर व इतर सुरक्षा उपकरणांच्या मागणीत प्रचंड वाढ झाली आहे. याचाच फायदा उचलत ऑनलाइन गंडा घालणार्‍या एका टोळीने

एन-95 मास्क व वैयक्तिक सुरक्षा उपकरणांचे उत्पादन करणार्‍या तळोजा एमआयडीसीतील व्हिनस सेफ्टी प्रा. लि. या कंपनीमार्फत एन-95 मास्क व वैयक्तिक सुरक्षा उपकरणांची ऑनलाइन विक्री करण्यात येत असल्याचे भासवून देशभरातील सरकारी व खासगी रुग्णालये व वैद्यकीय क्षेत्राशी संबंधित व्यक्तींना परस्पर संपर्क साधण्यास सुरुवात केली.

एखाद्या रुग्णालयाने मास्क व इतर वैयक्तिक सुरक्षा उपकरणे व साहित्याची खरेदी करण्याची तयारी दर्शविल्यास अशा रुग्णालयांना या टोळीतील सदस्य बँकेचे खाते क्रमांक देऊन त्यात ऑनलाइन पैसे जमा करण्यास सांगतात. त्यानंतर ही टोळी त्यांना साहित्य न पाठविता त्यांची फसवणूक करते. या टोळीने 2 एप्रिल रोजी वॉल्टर जॉन या व्यक्तीकडून सात हजार 500 रुपये स्वीकारले होते, मात्र त्यांना मास्क व इतर साहित्य न मिळाल्याने त्यांनी दुसर्‍या दिवशी तळोजा येथील व्हिनस सेफ्टी कंपनीला संपर्क साधल्यानंतर फसवणुकीचा प्रकार निदर्शनास आला.

या टोळीने जम्मू-काश्मीर येथील स्वरा रुग्णालयातही संपर्क साधून मास्क व इतर साहित्य विकण्याचा बहाणा करून गंडा घालण्याचा प्रयत्न केला. या रुग्णालयाच्या प्रतिनिधींनी व्हिनस सेफ्टी कंपनीला संपर्क साधून खातरजमा केल्याने त्यांची फसवणूक टळली. या टोळीने व्हिनस सेफ्टी प्रा. लि. या कंपनीच्या नावाने देशभरातील अनेक रुग्णालये व व्यक्तींना अशाच पद्धतीने ऑनलाइन गंडा घातला असण्याची शक्यता असल्याने या कंपनीचे प्रोडक्शन मॅनेजर महेंद्र घाग यांनी तळोजा पोलीस ठाण्यात तक्रार दाखल केली. त्यानुसार पोलिसांनी या प्रकरणातील टोळीविरोधात गुन्हा दाखल करून त्यांचा शोध सुरू केला.

सध्या देशात मोठ्या प्रमाणावर करोना या संसर्गजन्य रोगाचा प्रादुर्भाव वाढल्याने व्हिनस सेफ्टी प्रा. लि. या कंपनीत तयार होणारे एन-95 मास्क व वैयक्तिक सुरक्षा उपकरणे सरकारच्या अत्यावश्यक सेवा बजावणार्‍या रुग्णालये व इतर आवश्यक ठिकाणी पुरविण्यात येत आहेत. त्यासाठी व्हिनस कंपनीने आपल्या सुरक्षा उपकरणासंदर्भात चौकशीसाठी व तक्रारीसाठी कस्टमर केअर क्रमांकाची सुविधा ठेवली आहे. कंपनीसोबत जोडल्या गेलेल्या वितरकांमार्फतच कंपनीकडून एन-95 मास्क व इतर सुरक्षा उपकरणांची विक्री केली जाते, असे कंपनीचे म्हणणे आहे.