रायगडात कोरोनाचा वाढता प्रादुर्भाव

पनवेल तालुक्यात 62 नवीन रुग्ण

पनवेल ः पनवेल तालुक्यात मंगळवारी 62 नवीन रुग्ण आढळले असून, सहा जणांचा मृत्यू  झाला आहे. 65 रुग्णांनी कोरोनावर मात केली आहे. पनवेल महापालिका हद्दीत 53 नवीन कोरोनाबाधित रुग्णांची नोंद झाली असून पाच जणांचा मृत्यू झाला आहे, तर 56 रुग्ण बरे झाल्याने त्यांना रुग्णालयातून घरी सोडण्यात आले आहे. पनवेल ग्रामीणमध्ये नऊ नवीन कोरोनाबाधित रुग्णांची नोंद झाली असून विचुंबेमध्ये एका व्यक्तीचा मृत्यू झाला आहे. मंगळवारी 9 रुग्णांनी कोरोनावर मात केल्याने त्यांना घरी सोडण्यात आले आहे.

………………………………………………………………………..

     रोहा तालुक्यात आढळले 13 कोरोना पॉझिटिव्ह

रोहा ः रोहा तालुक्यात रविवारी एकाच दिवशी कोरोनाचे 10 रुग्ण आढळल्याची घटना ताजी असतानाच मंगळवारी (दि. 23) पुन्हा तालुक्यात 13 कोरोना पॉझिटिव्ह व्यक्तींची नोंद झाल्याची माहिती तहसीलदार कविता जाधव यांनी दिली. नव्या रुग्णांमुळे तालुक्यातील कोरोनाबाधितांची एकूण संख्या 48वर जाऊन पोहचली आहे.

कोरोना पॉझिटिव्ह आढळलेल्या 13 रुग्णांत सात पुरुष व सहा स्त्रियांचा समावेश आहे. यात 15 वर्षांच्या आतील चार जण, तर 60 वर्षांसह पुढील तीन व्यक्ती आहेत. धोंडखार खोपे येथे चार, पडम येथे दोन आणि वरवठणे येथे सर्वाधिक सात रुग्ण आढळले आहेत. या सर्वांना पनवेल व कामोठे येथे उपचारासाठी नेण्यात आले आहे. दरम्यान, तालुक्यात आतापर्यंत 25 रुग्णांनी कोरोनावर मात करून ते बरे होऊन घरी गेल्याने सद्यस्थितीत 23 सक्रिय रुग्ण उरले आहेत.

………………………………………………………………………..

उरणमध्ये आणखी एक रुग्ण

उरण : उरण तालुक्यात करंजा कोंढरीचा पाडा येथील 41 वर्षीय व्यक्ती कोरोना पॉझिटिव्ह आढळली आहे, तर जेएनपीटी वसाहत येथील 51 वर्षीय महिलेला नवी मुंबई येथील अपोलो रुग्णालयातून डिस्चार्ज देण्यात आला. उरण तालुक्यातील पॉझिटिव्ह रुग्णसंख्या 213वर पोहचली आहे. त्यापैकी 177 रुग्ण पूर्णपणे बरे झाले आहेत. उर्वरित 34 पॉझिटिव्ह रुग्णांवर विविध रुग्णालयांत उपचार सुरू असल्याची माहिती उरणचे तहसीलदार भाऊसाहेब अंधारे यांनी दिली आहे.

………………………………………………………………………..

पेण तालुक्यात कोरोनाचा पहिला बळी

पेण ः पेण तालुक्यातील कोरोना रुग्णसंख्येत गेल्या काही दिवसांपासून वाढ होत असल्याने पेणकर चांगलेच धास्तावले आहेत. मंगळवारी पॉझिटिव्ह रुग्णसंख्या 65 झाली असून यामधील 28 जण बरे झाले आहेत, तर बेणसे येथील एका 65 वर्षीय वृद्धाचा मृत्यू झाला आहे. बुधवारपासून अचानक कोरोना रुग्ण वाढत जाऊन एका आठवड्यात ही संख्या 40पर्यंत गेली होती. पेण तालुक्यात कोरोनाचा पहिला बळी गेला आहे. 40 रुग्णांमधील नवीन वसाहत फणसडोंगरी येथील दोन पुरुष व पाटणोली येथील एक महिला आणि एक पुरुष बरे झाले असून एकूण रुग्णसंख्या 36वर आली आहे. पेणमधील वाढती रुग्णसंख्या लक्षात घेता नागरिक, दुकानदार स्वयंस्फूर्तीने बंद पाळणार असून हा बंद 24 तारखेपासून 28 तारखेपर्यंत असणार असल्याचे बोलले जात आहे.

………………………………………………………………………..

नेरळमध्ये दोन नवीन रुग्ण

कर्जत ः कर्जत तालुक्यात सोमवारी मोठ्या प्रमाणात कोरोनाचे रुग्ण वाढले होते. मंगळवारी मात्र त्यात दिलासा मिळाला असून केवळ दोनच कोरोना पॉझिटिव्ह रुग्ण आढळले आहेत. दरम्यान, नेरळ ग्रामस्थांनी काळजी घेण्यासाठी पुढील काळात शासनाच्या आदेशाने नियम पाळून व्यवहार करण्याचे ठरविले आहे. कर्जत तालुक्यात नेरळ येथील महावितरण कंपनीच्या कर्मचार्‍याचा अहवाल पॉझिटिव्ह आला आहे, तर ममदापूर येथील सोमवारी मृत पावलेल्या कोरोना पॉझिटिव्ह महिला रुग्णाच्या 44 वर्षीय मुलाचा अहवालदेखील पॉझिटिव्ह आला आहे.

………………………………………………………………………..

वरवठणेतील कोरोनाबाधितांची संख्या आठवर

नागोठणे ः प्रतिनिधी

येथील रिलायन्स कंपनीत काम करणारा वरवठणे गावातील एक स्थानिक कर्मचारी कोरोनाबाधित झाल्याचे दोन दिवसांपूर्वी स्पष्ट झाले होते. तातडीने त्यांच्या घरातील सर्वांची तपासणी केल्यानंतर यातील सातही जण कोरोनाग्रस्त झाल्याचे उघड झाले आहे. यामुळे या गावातील एकाच घरातील आठ जण कोरोनाबाधित झाल्याने संपूर्ण गावात भीतीचे वातावरण पसरले आहे.

नागोठणे शहराशेजारील वरवठणे गावात दोन दिवसांपूर्वी रिलायन्स कंपनीच्या एका कर्मचार्‍याला कोरोनाची बाधा होऊन त्यांचा रिपोर्टसुद्धा पॉझिटिव्ह आला होता. दोनच दिवसात त्यांच्या घरातील काही जणांना लागण झाल्याची घटना घडली असून कोरोनाबाधितांची संख्या आठवर पोहचली आहे. याबाबत सरपंच राजश्री दाभाडे यांना विचारले असता त्यांनी या घटनेला दुजोरा देताना रिलायन्सच्या कर्मचार्‍याकरवी कोरोनाचा आमच्या वरवठणे गावात प्रवेश झाला असल्याने कंपनी व्यवस्थापनाने याचे भान ठेवत संबंधित बाधित व्यक्तीच्या संपर्कात आलेल्या सर्वांची कोरोना टेस्ट करावी तसेच संपूर्ण गावात औषधांची फवारणी करावी, अशी मागणी केली आहे, मात्र कंपनीने अजूनही त्याकडे दुर्लक्ष केल्याबद्दल त्यांनी नाराजी व्यक्त केली.