आमदार महेश बालदी यांची वचनपूर्ती

स्वजल धारा पाइपलाइनचे उद्घाटन; आगरी कोंढरीपाडा ग्रामस्थांची पाणीसमस्या दूर

उरण ः वार्ताहर

शिवशक्ती मित्र मंडळ आणि शिवशक्ती स्वजल धारा पाणी समिती (आगरी कोंढरीपाडा) यांच्या देखरेखीखाली टाकण्यात येणार्‍या स्वजल धारा पाणी पाइपलाइनचे उद्घाटन आमदार महेश बालदी यांच्या हस्ते नुकतेच करण्यात आले. या कार्यक्रमाचे औचित्य साधून निवडणुकीत दिलेल्या वचनांची पूर्तता करणारा आमदार म्हणून आगरी कोंढरीपाडा ग्रामस्थांनी आमदार महेश बालदी यांचा नागरी सत्कार केला.

या वेळी भाजपचे तालुकाध्यक्ष रवी भोईर, माजी नगराध्यक्ष नितीन पाटील, माजी चेअरमन प्रदीप नाखवा, शहराध्यक्ष तथा नगरसेवक कौशिक शहा, उपनगराध्यक्ष जयविन कोळी, चाणजे माजी सरपंच तथा चाणजे विभाग अध्यक्ष जितेंद्र घरत, भानुदास नाखवा, नितीन कोळी, राजेश नाखवा तसेच ग्रामस्थ उपस्थित होते.

चाणजे ग्रुप ग्रामपंचायत हद्दीतील आगरी कोंढरीपाडा ग्रामस्थांना 15 दिवसांआड पाणीपुरवठा होत असल्याने येथील ग्रामस्थांना पाणीटंचाईचा सामना करावा लागत होता. त्यामुळे परिसरातील ग्रामस्थांना भेडसावणारी पाण्याची समस्या मार्गी लावण्यासाठी आमदार म्हणून निवडून आल्यावर पुढाकार घेण्याचे अभिवचन या मतदारसंघाचे आमदार महेश बालदी यांनी निवडणुकीवेळी दिले होते. त्या वचनाची पूर्तता म्हणून आमदार महेश बालदी यांनी स्वतःकडून पाच लाखांचा निधी तसेच माजी सरपंच जितेंद्र घरत यांनी पाइप शिवशक्ती मित्र मंडळ व शिवशक्ती स्वजल धारा पाणीपुरवठा समिती आगरी कोंढरीपाडा यांच्याकडे उपलब्ध करून दिले. आमदार महेश बालदी यांच्या कार्याची दखल घेऊन उपस्थित ग्रामस्थांनी वचनांची पूर्तता करणारा आमदार महेश बालदी यांचे जोरदार स्वागत करीत नागरी सत्कार केला.