रेमडेसिवीरच्या नावाखाली फसवणूक; पनवेल पोलिसांकडून त्रिकूट गजाआड

पनवेल : वार्ताहर

रेमडेसिवीर इंजेक्शन देतो असे सांगून फसवणूक करणार्‍या त्रिकुटाला पोलीस आयुक्त बिपीनकुमार सिंह, सहआयुक्त डॉ. जय जाधव, उपायुक्त शिवराज पाटील व सहाय्यक आयुक्त नितीन भोसले-पाटील यांच्या मार्गदर्शनाखाली पनवेल शहर पोलिसांनी अटक केली आहे. आरोपींकडून 83 हजारांचा मुद्देमाल हस्तगत करण्यात आला आहे. साक्षीदारांचे काका कोरोना झालेला असल्याने ते पुणे येथे आंतररुग्ण उपचार घेत होतेे. त्यांना चार रेमडेसिवीर इंजेक्शनची आवश्यकता होती. साक्षीदार यांना रेमडेसिवीर इंजेक्शनसाठी आकाश म्हात्रे याच्याकडुन सौरभ बोनकर यांचा मोबाइल नंबर प्राप्त झाला होता. त्यांनी बोनकर यांना संपर्क करून चार रेमडेसिवीरची मागणी केली होती. त्याने साक्षीदारांना अनिकेल तांडेल यांचा मोबाइल नंबर देऊन पनवेल रेल्वे स्टेशन येथे 88,000 रुपये घेवुन बोलावले होते. त्यानुसार साक्षीदारांनी फिर्यादींना 88,000 रुपये घेऊन 26 एप्रिलला 12.30 वाजता पनवेल रेल्वे स्टेशन येथे पाठविले होते. नंतर अनिकेत तांडेल याने फिर्यादींना बामणडोंगरी रेल्वे स्टेशनचे बाहेर बोलावुन त्यांच्याकडुन 88,000 रुपये घेवुन चार रेमडेसिवीर इंजेक्शन आणुन देतो असे सांगितले. तांडेल हे सांगुन गेला तो परत आला नाही. म्हणुन फिर्यादींनी तांडेल याला संपर्क केला त्याने खोटे सांगितले की, पोलिसांनी पैसे व रेमडेसिवीर इंजेक्शन जप्त केले असुन तुम्ही पैसे परत मागु नका नाहीतर मी तुमचे नाव पोलिसांना सांगेल, अशी धमकी दिली होती. त्यामुळे आरोपींविरोधात पनवेल शहर पोलीस ठाण्यात तक्रार दाखल करण्यात आली. त्याअनुषंगाने शहर पोलीस ठाण्याचे गुन्हे प्रकटीकरण पथकाचे अधिकारी व अंमलदारांनी गुन्ह्यातील तीन आरोपी अनिकेत तांडेल याला सुकापूर, पनवेल आणि दोन आरोपी सौरभ बोनकर व आकाश म्हात्रे यांना माणगाव, जि.रायगड येथुन अटक करण्यात आली. ही कारवाई पनवेल शहर पोलीस ठाण्याचे वरिष्ठ निरीक्षक अजयकुमार लांडगे व निरीक्षक (गुन्हे) संजय जोशी यांच्या मार्गदर्शनाखाली गुन्हे प्रकटीकरण पथकाचे सहाय्यक निरीक्षक अनिल देवळे, उपनिरीक्षक सुनिल तारमळे, हवालदार नितीन वाघमारे, नाईक परेश म्हात्रे, विनोद पाटील, पंकज पवार, गणेश चौधरी, शिपाई विवेक पारासुर, यादवराव घुले, सुनिल गर्दनमारे, राजु खेडकर व साळुंखे यांनी केली आहे.

कोविड-19 आजारामध्ये वापरण्यात येणारे रेमडेसिवीर इंजेक्शनचा पुरवठा शासकीय यंत्रणेच्या देखरेखीखाली होत असल्याने कोणीही अशाप्रकारे खाजगी व्यक्तींना रेमडेसिवीरसाठी पैसे देऊन फसवणुक करून घेऊ नये.

-अजयकुमार लांडगे, वरिष्ठ पोलीस निरीक्षक