कळंबोलीत रविवारी कुस्त्यांचा आखाडा

रुस्तम ए हिंद पै. सिकंदर शेख विरुद्ध रुस्तम ए हिंद लाली गुरुदास पोल यांचा विशेष आकर्षण सामना

पनवेल : रामप्रहर वृत्त
भारतीय जनता युवा मोर्चा पनवेलतर्फे येथील विधानसभा मतदारसंघात माजी खासदार लोकनेते रामशेठ ठाकूर, लोकप्रिय आमदार प्रशांत ठाकूर, आमदार महेश बालदी, भाजपचे जिल्हाध्यक्ष अविनाश कोळी, पनवेल महापालिकेचे माजी सभागृह नेते परेश ठाकूर यांच्या नेतृत्वाखाली आयोजित भव्य क्रीडा महोत्सव अर्थात नमो चषक 2025 अंतर्गत 9 फेब्रुवारी रोजी सायंकाळी 4 वाजता कळंबोली सेक्टर 16 येथे भव्य कुस्ती स्पर्धा होणार आहे.
या स्पर्धेत रुस्तम ए हिंद पैलवान सिकंदर शेख (सोलापूर) विरुद्ध रुस्तम ए हिंद लाली गुरुदास पोल (पंजाब) यांचा विशेष आकर्षण सामना होणार असून यामधील विजेत्या पैलवानास पाच लाख रुपये व मानाची गदा, तर महिलांच्या गटात महाराष्ट्र चॅम्पियन पैलवान अमेघा घरत (पनवेल) विरुद्ध महाराष्ट्र चॅम्पियन पैलवान अंकिता फातले (कोल्हापूर) यांचा खास आकर्षण सामना होणार आहे. यातील विजेत्या पैलवानाला 51 हजार रुपये व मानाची गदा देऊन गौरविण्यात येणार आहे.
याशिवाय पुरुषांच्या गटात महाराष्ट्र चॅम्पियन पै. निखिल कदम विरुद्ध महाराष्ट्र चॅम्पियन पै. अनिल कचरे, पै. शुभम वळखडे विरुद्ध पै. आकाश दुबे, पै. श्रेयश कचरे विरुद्ध पै. सुशांत देवमाने, पै. साजन पावशे विरुद्ध पै. निलेश कदम आणि पै. समाधान घनपट विरुद्ध विजय घुले यांच्या सामना रंगणार आहे. महिला गटात पै. स्नेहा येवले विरुद्ध वैष्णवी यादव आणि पै. रितिका कारंडे विरुद्ध गौरी जाधव यांचा विशेष सामना होणार आहे.
कुस्ती स्पर्धेतील महिला 35, 40 व 45 किलो वजनाखालील गटातील प्रत्येक विजेतीला एक हजार रुपये व उपविजेतीस 500 रुपये, 50 किलो खालील गटातील विजेतीला 1500 रुपये व उपविजेतीस एक हजार रुपये, 55 किलो वजनाखालील गटातील विजेतीला दोन हजार रुपये व उपविजेतीस 1500 रुपये आणि 57 ते 76 किलो वजनाखालील गटातील विजेतीस 10 हजार रुपये व नमो केसरी मानाची गदा, द्वितीय क्रमांकाला पाच हजार रुपये तर तृतीय क्रमांकाला तीन हजार रुपये, 17 वर्षाखालील मुले गटातील 30, 35, 40 व 45 किलो वजनाखालील गटातील प्रथम क्रमांकास प्रत्येकी एक हजार रुपये व द्वितीय क्रमांकाला 500 रुपये, 50 व 55 किलो खालील गटातील प्रथम क्रमांकाला प्रत्येकी 1500 रुपये द्वितीय क्रमांकास प्रत्येकी एक हजार रुपये बक्षीस आहे. 60, 65 आणि 70 किलो वजनाखालील गटातील प्रथम क्रमांकास अनुक्रमे दोन हजार रुपये, तीन हजार रुपये आणि पाच हजार रुपये, द्वितीय क्रमांकास अनुक्रमे 1500, दोन हजार आणि तीन हजार रुपये, वरिष्ठ मुले 50 ते 60 किलो वजनाखालील गटातील प्रथम क्रमांकाला तीन हजार रुपये, द्वितीय दोन हजार रुपये बक्षीस आहे. 60 ते 70 किलो वजनाखालील गटातील प्रथम क्रमांकाला पाच हजार रुपये, द्वितीय क्रमांकास तीन हजार रुपये, 70 ते 79 किलो वजनाखालील गटातील प्रथम क्रमांकाला पाच हजार रुपये, द्वितीय तीन हजार रुपये तसेच 79 ते 125 किलो वजनाखालील गटातील प्रथम क्रमांकाला 10 हजार रुपये व नमो केसरी मानाची गदा, द्वितीय क्रमांकास पाच हजार रुपये व तृतीय क्रमांकाला तीन हजार रुपये अशी कुस्ती स्पर्धेत एकूण आठ लाख 51 हजार रुपयांची बक्षिसे आहेत.
मानाच्या अशा या कुस्ती दंगलींचा कुस्तीप्रेमींनी लाभ घ्यावा, असे आवाहन स्पर्धेचे संयोजक कळंबोली भाजप तसेच पनवेल महापालिकेचे माजी स्थायी समिती सभापती अमर पाटील यांनी केले आहे.