जिल्हा परिषदेच्या शाळेला पालिकेची नोटीस; इमारतीचा वापर बंद करण्याचे आदेश

पनवेल : बातमीदर

काळुंद्रे जिल्हा परिषद शाळेच्या दोन वर्गखोल्या धोकादायक असल्याचे वृत्त प्रसिद्ध झाल्यानंतर पनवेल महापालिकेने जिल्हा परिषदेच्या मालकीची शाळा असल्याचे कारण दाखवित इमारत तत्काळ रिकामी करण्याचे आदेश दिले. प्रभाग अधिकारी श्रीराम हजारे यांनी संबंधित प्रशासनाला पत्र लिहून ही माहिती कळविली.

पनवेल महापालिकेत समाविष्ट झालेल्या ग्रामपंचायत हद्दीत जिल्हा परिषदेच्या 51 शाळा आहेत. जिल्हा परिषदेच्या शाळा हस्तांतरित करण्यास पनवेल महापालिका सकारात्मक असली, तरी जिल्हा परिषदेने घातलेल्या अटींची पूर्तता शक्य नसल्यामुळे हस्तांतरणाविषयी सध्या कोणतीही हालचाल नाही. त्यामुळे महापालिकेच्या हद्दीतील शाळांची मालकी जिल्हा परिषदेकडेच आहे. जिल्हा परिषदेच्या शाळांच्या इमारती अनेक वर्षे जुन्या असल्यामुळे जीर्ण झाल्या आहेत. प्रभाग क्रमांक ड मधील काळुंद्रे गावातील जिल्हा परिषदेच्या 5 वर्गखोल्यांपैकी 2 वर्गांतून गळती होत असल्यामुळे उर्वरित तीन वर्गांत शाळा भरविली जाते. हे वृत्त प्रसिद्ध झाल्यानंतर पनवेल महापालिकेच्या प्रभाग अधिकार्‍यांनी संबंधित शाळेच्या इमारतीची पाहणी केली. इमारतीच्या भिंतींना, कॉलमला तडे गेले असल्याचे निदर्शनास आले. सार्वजनिक रस्ता इमारतीच्या शेजारून जात असल्यामुळे नागरिकांच्या जीवितासही धोका असल्याचे महापालिकेचे म्हणणे आहे. त्यामुळे इमारतीची तज्ज्ञ अभियंत्यांच्या निरीक्षणाखाली आवश्यक दुरुस्ती करून इमारत सुस्थितीत असल्याचे प्रमाणपत्र सादर करावे किंवा इमारत पाडावी, अन्यथा कोणत्याही प्रकारची जीवितहानी झाल्यास पनवेल महापालिका जबाबदार राहणार नाही, असे पत्र देऊन महापालिकेने आपली जबाबदारी नसल्याचे कागदोपत्री स्पष्ट करण्याचा प्रयत्न केला आहे. प्रभाग अधिकारी श्रीराम हजारे यांनी नुकतेच हे पत्र शाळेचे मुख्याध्यापक, गटविकास अधिकार्‍यांना दिले आहे.

• 34 शाळांची डागडुजी आवश्यक

महापालिकेच्या हद्दीत जिल्हा परिषदेच्या 51 शाळा आहेत. या शाळांपैकी 34 शाळांची डागडुजी करण्याची आवश्यकता असल्याचे शिक्षण विभागाचे म्हणणे आहे. मात्र हस्तांतरणाच्या वादातील शाळांची डागडुजी महापालिका कशी करणार, असा प्रश्न उपस्थित झाल्यामुळे शाळांची डागडुजी रखडली आहे. शेकडो विद्यार्थी अशा प्रकारच्या शाळेतच शिक्षण घेत आहेत.