राजस्थानच्या पराभवाबरोबर प्ले-ऑफचे स्वप्न भंगले

दिल्ली : वृत्तसंस्था

येथील फिरोज शहा कोटला मैदानावर झालेल्या दिल्ली कॅपिटल्स विरुद्ध राजस्थान रॉयल्स यांच्यातील सामन्यात दिल्लीने राजस्थानवर 5 गडी राखून मात केली असून या पराभवाबरोबच प्ले-ऑफमध्ये स्थान मिळवण्याचे राजस्थानचे स्वप्न भंगले आहे. दरम्यान, दिल्लीने प्ले-ऑफमधील आपले स्थान आधीच निश्चित केलेले आहे. गुणतालिकेत 18 गुणांसह दिल्ली दुसर्‍या स्थानी आहे.

राजस्थानला 20 षटकांत 9 बाद 115 धावांवर रोखल्यानंतर दिल्लीने 116 धावांचे लक्ष्य 5 गड्यांच्या मोबदल्यात 16.1 षटकांत पार केले. दिल्लीच्या डावात ऋषभ पंतने अर्धशतकी खेळी करत मोलाची कामगिरी बजावली. त्याने 38 चेंडूंत 2 चौकार आणि 5 षटकारांनिशी 53 धावा केल्या.

दरम्यान, राजस्थानसाठी ‘करो या मरो’ अशी स्थिती या सामन्यात होती. खात्यात 11 गुण असलेल्या राजस्थानचा हा साखळीतील शेवटचा सामना होता आणि हा सामना जिंकल्यास राजस्थानसाठी प्ले-ऑफचे दरवाजे खुले राहणार होते, मात्र राजस्थानने सुमार कामगिरीमुळे ही संधी गमावली.