कॉमनवेल्थ टेबल टेनिस स्पर्धेत सीकेटीच्या स्वस्तिका घोषची सुवर्णझेप

पनवेल ः रामप्रहर वृत्त
जनार्दन भगत शिक्षण प्रसारक संस्थेच्या चांगू काना ठाकूर आर्ट्स, कॉमर्स अँड सायन्स कॉलेज, न्यू पनवेल (अधिकारप्रदत्त स्वायत्त) येथील पदव्युत्तर शिक्षण घेणारी व आंतरराष्ट्रीय टेबल टेनिसपटू कु. स्वस्तिका घोष हिने कॉमनवेल्थ टेबल टेनिस चॅम्पियनशिप २०२६मध्ये भारतीय संघाचे प्रतिनिधित्व करीत सुवर्णपदक पटकावून देशासह पनवेल आणि महाराष्ट्राचे नाव उंचावले आहे. स्वस्तिका घोष महाविद्यालयाच्या इंग्रजी विभागात पदव्युत्तर शिक्षण घेत असून शिक्षण आणि क्रीडा यांचा उत्कृष्ट समतोल साधत तिने आंतरराष्ट्रीय स्तरावर आपल्या खेळाची वेगळी ओळख निर्माण केली आहे. वेगवान, आक्रमक आणि तांत्रिकदृष्ट्या परिपूर्ण खेळाच्या जोरावर तिने अनेक राष्ट्रीय व आंतरराष्ट्रीय स्पर्धांमध्ये उल्लेखनीय यश संपादन केले आहे. त्याच यशस्वी वाटचालीचा आणखी एक सुवर्ण अध्याय तिने कॉमनवेल्थ स्पर्धेत लिहिला आहे. भारतीय संघासाठी सुवर्णपदक जिंकून स्वस्तिकाने देशाचा तिरंगा अभिमानाने फडकावला असून तिच्या या देदिप्यमान कामगिरीचे सर्व स्तरांतून कौतुक होत आहे. तिच्या यशामुळे पनवेलच्या क्रीडाक्षेत्रात उत्साहाचे वातावरण निर्माण झाले असून युवा खेळाडूंना नवी प्रेरणा मिळाली आहे. स्वस्तिकाच्या ऐतिहासिक यशाबद्दल जनार्दन भगत शिक्षण प्रसारक संस्थेचे चेअरमन माजी खासदार लोकनेते रामशेठ ठाकूर, अध्यक्ष अरुणशेठ भगत, व्हाईस चेअरमन वाय. टी. देशमुख, संस्थेचे कार्यकारी मंडळ सदस्य व आमदार प्रशांत ठाकूर, माजी सभागृहनेते तथा विद्यमान नगरसेवक परेश ठाकूर, सचिव डॉ. एस. टी. गडदे, महाविद्यालयाचे प्राचार्य प्रो. डॉ. एस. के. पाटील, क्रीडा संचालक डॉ. विनोद नाईक, इंग्रजी विभागप्रमुख डॉ. आर. व्ही. येवले, प्राध्यापक, शिक्षकेतर कर्मचारी आणि विद्यार्थ्यांनी तिचे मनःपूर्वक अभिनंदन केले. स्वस्तिका घोषचे यश आमच्या विद्यार्थ्यांसाठी प्रेरणादायी असून तिच्या भावी कारकिर्दीसाठी आम्ही मनःपूर्वक शुभेच्छा देतो, अशा शब्दांत प्राचार्य प्रो. डॉ. एस. के. पाटील यांनी स्वस्तिकाचे अभिनंदन केले आहे. स्वस्तिकाच्या सुवर्ण कामगिरीमुळे महाविद्यालयात आनंदाचे वातावरण निर्माण झाले असून विविध क्रीडा संस्था, नागरिक आणि क्रीडाप्रेमींकडून तिच्यावर अभिनंदनाचा वर्षाव होत आहे.