शिवछत्रपतींच्या जयघोषाने किल्ले रायगड दुमदुमला

राज्याभिषेक दिन सोहळा शिवभक्तांच्या अभूतपूर्व उत्साहात

अलिबाग : रामप्रहर वृत्त
छत्रपती शिवाजी महाराज यांचा राज्याभिषेक दिन सोहळा सोमवारी (दि. 6) किल्ले रायगडावर शिवभक्तांच्या अभूतपूर्व उत्साहात झाला. युवराज संभाजी राजे छत्रपती व युवराजकुमार शहाजीराजे छत्रपती यांच्या हस्ते शिवाजी महाराजांच्या पुतळयाला मंत्रोच्चारांच्या जयघोषात जलाभिषेक तसेच दुग्धाभिषेक करण्यात आला. त्यानंतर मेघडंबरीतील शिवपुतळ्याला मुद्राभिषेक करण्यात आला.
या वेळी युवराज्ञी संयोगिताराजे, आमदार अनिकेत तटकरे, प्रमोद पाटील, मनोज चव्हाण, प्रांताधिकारी प्रतिमा पुदलवाड आदींसह हजारोंच्या संख्येने शिवभक्त उपस्थित होते.
अखिल भारतीय शिवराज्याभिषेक महोत्सव समितीने या सोहळयाचे आयोजन केले होते. हा प्रेरणादायी सोहळा याची देही याची डोळा अनुभवण्यासाठी शिवभक्तांनी प्रचंड गर्दी केली होती. होळीचा माळ, बाजारपेठ, राजदरबार शिवभक्तांनी फुलून गेला होता. सकाळी ध्वजपूजनाने सोहळ्याला सुरुवात झाली. त्यानंतर छत्रपती शिवाजी महाराजांची पालखी राजसदरेकडे निघाली. यावेळी महाराजांच्या जयजयकार आणि ढोल-ताशांच्या निनादाने आसमंत दुमदुमून निघाला. हजारो शिवभक्त हातात भगवे झेंडे घेवून गुलाल आणि भंडार्‍याची उधळण करीत जल्लोष करीत होते. होळीच्या माळावर सुरु असलेल्या मर्दानी खेळांच्या प्रात्यक्षिकांनी तर राजदरबारात सुरू असलेल्या शाहिरी पोवाड्यांनी सर्व परिसर वीररसाने न्हाऊन निघाला होता. महाराजांची पालखी राजसदरेवर येताच मुख्य सोहळ्याला सुरुवात झाली. युवराज संभाजी राजे छत्रपती व युवराजकुमार शहाजी राजे छत्रपती यांच्या हस्ते शिवाजी महाराजांच्या पुतळयाला मंत्रोच्चारांच्या जयघोषात जलाभिषेक तसेच दुग्धाभिषेक करण्यात आला. मेघडंबरीतील शिवपुतळ्याला मुद्राभिषेक करण्यात आला. त्यानंतर मुख्य पालखी सोहळयाला प्रारंभ झाला. श्रीजगदीश्वराचे दर्शन घेवून या चैतन्यमय सोहळ्याची सांगता झाली.
रायगड किल्ल्यावर शिवराज्याभिषेक दिन सोहळ्याला येणार्‍या शिवप्रेमींची कोणतीही गैरसोय होऊ नये यासाठी कार्यक्रमाची रुपरेषा, गडावर जाण्याचे व उतरण्याचे प्रमुख मार्ग, राहण्याची सोय, वैद्यकीय सेवा, अन्नछत्र, स्वच्छतागृहे, महिलांसाठी करण्यात आलेली स्वतंत्र व्यवस्था, गडाच्या पायथ्याला असलेली वाहनतळे, पायथ्याचे अन्नछत्र याची सर्व माहिती व नकाशे क्यूआ कोडच्या माध्यमातून उपलब्ध करुन देण्यात आली होती.
शिवप्रेमींसाठी पिण्याच्या पाण्याची व्यवस्था ग्रामीण पाणीपुरवठा विभागाकडून करण्यात आली आहे. गडाच्या पायथ्याला,पाचाड व कोंझर येथे वाहने पार्किंग सुविधा केली होती. वाहतूक कोंडी टाळण्यासाठी वाहने पाच ते सात किमी दूर उभी करण्यात आली होती. मात्र येथून शिवप्रेमींना ये-जा करण्यासाठी खास बस सुविधा मोफत ठेवण्यात आल्या होत्या. रायगडावर ये-जा करताना कोणताही अनुचित प्रकार घडल्यास तातडीने मदतकार्य मिळावे यासाठी विविध रेस्क्यू टिम व ट्रेकर्स तैनात आहेत. त्याचबरोबर ठिकठिकाणी चोख पोलीस बंदोबस्तही ठेवण्यात आला.
हे कार्यक्रम ठरले आकर्षण
आजच्या या शिवराज्याभिषेक दिन सोहळ्यात धार तलवारीची, युद्धकला महाराष्ट्राची तसेच जागर शिवशाहिरांचा..स्वराज्याच्या इतिहासाचा व सोहळा पालखीचा, स्वराज्याच्या ऐक्याचा हे कार्यक्रम उपस्थित शिवभक्तांचे प्रमुख आकर्षण ठरले.