पेट्रोल-डिझेलवरील व्हॅट कमी केल्यामुळे सामान्य जनतेला दिलासा

भाजप नेते अ‍ॅड. महेश मोहिते यांच्याकडून सरकारी निर्णयाचे स्वागत

अलिबाग ः प्रतिनिधी

पेट्रोल आणि डिझेलवरील मूल्यवर्धित करात (व्हॅट) कपात करीत पेट्रोल आणि डिझेल अनुक्रमे पाच आणि तीन रुपयांनी स्वस्त करण्याच्या राज्य सरकारच्या निर्णयाचे भारतीय जनता पक्षाचे दक्षिण रायगड जिल्हाध्यक्ष अ‍ॅड. महेश मोहिते यांनी स्वागत केले आहे.

भाजप दक्षिण रायगड सरचिटणीस मिलिंद पाटील यांनी प्रसिद्धीस दिलेल्या पत्रकात भाजप दक्षिण रायगड जिल्हाध्यक्ष अ‍ॅड. महेश मोहिते यांनी म्हटले आहे की, केंद्र सरकारने पेट्रोल-डिझेलवरील उत्पादन शुल्कात दोनदा कपात केली. त्याचवेळी भारतीय जनता पक्षाने राज्यात सत्तेत असलेल्या तत्कालीन महाविकास आघाडी सरकारने पेट्रोल डिझेलवरील व्हॅटमध्ये कपात करावी, अशी मागणी सातत्याने केली होती. केंद्र सरकारच्या निर्णयाचे अनुकरण करीत भाजपची सत्ता असलेल्या राज्य सरकारांनी इंधनावरील करात कपात केली होती. महाविकास आघाडी सरकारने मात्र इंधनावरील व्हॅट कमी करण्याच्या भाजपच्या मागणीकडे सातत्याने दुर्लक्ष केले.

मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी सत्तेत आल्या आल्या इंधनावरील व्हॅटमध्ये कपात करीत सामान्य जनतेला मोठा दिलासा दिला आहे.

या निर्णयाबद्दल भारतीय जनता पक्ष मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांचे अभिनंदन करीत आहे, असे अ‍ॅड. महेश मोहिते यांनी प्रसिद्धी पत्रकात नमूद केले आहे.

केंद्र आणि राज्य यांच्या सहकार्याचे नवे पर्व महाराष्ट्रात सुरू झाले असून सबका साथ, सबका विकास हा पंतप्रधान मोदी यांचा मंत्र मुख्यमंत्री शिंदे व उपमुख्यमंत्री फडणवीस यांच्या नेतृत्वाखाली महाराष्ट्राच्या विकासाला नवी गती देईल, असा विश्वासही अ‍ॅड. मोहिते यांनी व्यक्त केला आहे.