सिडकोकडून महापालिकेकडे भूखंडांचे हस्तांतरण

पनवेल : बातमीदार  : महापालिकेच्या स्थापनेनंतर सिडकोकडून महापालिकेकडे वेगवेगळ्या सोयीसुविधांचे हस्तांतरण सुरू आहे. पनवेल महापालिकेला सिडकोतर्फे खारघरमधील 17 बाजारतळांचे भूखंड आणि पनवेलमधील बगिचा आणि मैदानांसाठी आरक्षित ठेवलेले 48 भूखंड हस्तांतरित करण्यात येणार आहेत. महापालिकेने पैसे अदा केले असून पुढील तांत्रिक प्रक्रिया सुरू आहे.

शहरांचे शिल्पकार असलेल्या सिडकोने शहरे वसवून नागरिकांना आवश्यक त्या सोयीसुविधा उभ्या केल्या. शहरांचे नागरिकांच्या मागणीनुसार नियोजन करणे सिडकोकडून होणे शक्य नाही. आवश्यक लोकसंख्या पार पडल्यानंतर अनेक प्रयत्नानंतर पनवेल महापालिकेची स्थापना करण्यात आली. महापालिकेची स्थापना करण्यात आल्यानंतर कचरा व्यवस्थापन, आरोग्याच्या सेवासुविधेचे हस्तांतरण सिडकोकडून पनवेल महापालिकेकडे करण्यात आले आहे. टप्प्याटप्प्याने इतरही सोयीसुविधांचे हस्तांतरण होत असून मागील दोन महिन्यांपासून सिडकोने खारघर शहरात रोज बाजारासाठी राखीव ठेवलेले बाजाराचे भूखंड हस्तांतरित करण्याची प्रक्रिया सुरू केली आहे.

खारघर शहरातील 17 वेगवेगळे भूखंड सुमारे एक कोटी 60 लाख रुपयांच्या मोबदल्यात महापालिकेला देऊ केले आहेत. महापालिकेने ही रक्कम सिडकोला अदा केली आहे. याशिवाय शहरातील नागरिकांच्या दृष्टीने सर्वात महत्त्वाचे समजले जाणारी मैदाने आणि बगिचेदेखील सिडको हस्तांतरित करणार आहे. यासाठी सिडको कोणताही मोबदला घेणार नसून प्रतिमैदान एक रुपया एवढी नाममात्र किंमत सिडको आकारणार आहे. सिडकोच्या कळंबोली, खांदा कॉलनी, नवीन पनवेल, पनवेल येथील सिडकोने बगिचा आणि उद्यानासाठी राखीव ठेवलेले भूखंड हस्तांतरित करण्याची प्रक्रिया सध्या सुरू आहे. 60 वर्षांच्या करारनाम्यावर सिडकोने महापालिकेकडे हस्तांतरण केले असून, यापुढेही नव्या करारनाम्यानुसार याची मालकी महापालिकेकडे राहणार आहे. महापालिकेकडे मालकी येणार असल्यामुळे बागबगिच्यांची देखभाल, दुरुस्ती, सुशोभीकरण आदींची जबाबदारी यापुढे पनवेल महापालिकेकडे येणार आहे. स्थानिक नगरसेवकांच्या सूचनेप्रमाणे यापुढे बगिच्यांचा विकास होणार आहे.