Breaking News

वृध्द महिलांचे सोने लांबविणारा ओलाचालक पोलिसांच्या ताब्यात

अडीज लाखे रुपयांचा मुद्देमाल केला जप्त

पनवेल : वार्ताहर
वयोवृध्द महिलांचा पाठलाग करून चैन जबरी चोरी करणार्‍या सराईत गुन्हेगारास मुंब्रा पोलीसांनी अटक करून त्याच्या कडून 2,51,148 रुपये किमतीचा मुद्देमाल हस्तगत केला आहे. मुंब्रा पोलीस ठाणे हददीतील दिवा शहर परिसरात वयोवृध्द महिलांना टार्गेट करून त्यांचा पाठलाग करून सदर महिला राहत्या इमारतीमध्ये जिन्याने घरी जात असताना अनोळखी आरोपी हा त्यांच्या गळयातील सोन्याचे दागिने जबरीने खेचून पळून जात होता. अशाप्रकारचे 10 ते 12 दिवसांमध्ये चार चोरीच्या घटना घडल्याने सदर गुन्हेगारास अटक करून चैन स्नॅचिंग गुन्हयांना प्रतिबंध करणे व घडलेले गुन्हे उघडकीस आणण्याचे मोठे आव्हान मुंब्रा पोलीसांसमोर होते. वयस्कर महिलांना टार्गेट करून त्यांचे दागिने चोरी होत असल्यामुळे जनमानसामध्ये गुन्हेगारास पकडून घडणार्‍या गुन्ह्यांना प्रतिबंध करण्याची मागणी होत होती.
त्यानुसार मुंब्रा पोलीस ठाण्याचे वरिष्ठ पोलीस निरीक्षक एन. बी. कोल्हटकर यांनी गुन्हयांच्या घटनास्थळी भेट देवून सदर गुन्हे उघडकीस आणण्याकरीता मुंब्रा व दिवा गुन्हे प्रकटीकरण पथकातील सपोनि शेळके, बोरसे व अमंलदार यांची दोन पथके तयार करून गुन्हेगाराची गुन्हे करण्याची पध्दत, गुन्हे करण्यासाठी वापरलेले वाहन तसेच इतर तांत्रिक व गोपनीय बातमीदारांच्या मदतीने आरोपी निष्पन्न करून त्यास अटक करणेबाबत वेळोवेळी मार्गदर्शन व पाठपुरावा केला. सदर पथकांनी 4 चैन जबरी चोरीचे गंभीर गुन्हे उघडकीस आणण्याकरिता अविरत परिश्रम करून दिवा, खर्डीगाव, मुंब्रा व शिळफाटा परिसरातील सुमारे 110 खाजगी व महानगरपालिकेचे सी.सी.टी.व्ही. कॅमेर्‍यांचे फुटेज संकलन केले.
सी.सी.टी.व्ही फुटेजचे बारकाईने निरीक्षण करून आरोपीने गुन्हयात वापरलेली मोटारसायकल व त्याचा जाण्या-येण्याचा मार्ग निष्पन्न केला. सदरचा आरोपी हा गुन्हे करून खर्डी गाव परीसरात जात असल्याचे आढळून आल्याने नमुद पथकांनी अहोरात्र सापळा लावून आरोपीस निर्मलनगरी खर्डी गाव येथून शिताफीने पाठलाग करून ताब्यात घेतले. कमलेश रामानंद गुप्ता (वय 33 वर्षे) असून तो एक ओलाचालक आहे. त्याला पोलिसांनी अटक केली.

Check Also

‘सीकेटी‘त इतिहास विभागाद्वारे आंतरराष्ट्रीय परिषद

विविध महाविद्यालये, विद्यापीठांतून 92 प्राध्यापक आणि संशोधकांची उपस्थिती पनवेल : रामप्रहर वृत्त जनार्दन भगत शिक्षण …

Leave a Reply