आपटा येथे एसटी बसमध्ये बॉम्ब; रायगडात खळबळ

रसायनी : प्रतिनिधी

पनवेल तालुक्यातील आपटा येथे एका एसटी बसमध्ये बॉम्बसदृश वस्तू आढळून आल्याने एकच खळबळ उडाली आहे. कर्जतवरून वस्तीची बस बुधवारी (दि. 20) रात्री 10च्या सुमारास आपटा थांब्यावर आल्यावर वाहक-चालकाच्या ही बाब निदर्शनास आली. त्यांनी ग्रामस्थांना याबाबत माहिती दिल्यानंतर पोलिसांना पाचारण करण्यात आले. मग अलिबाग येथील बॉम्बशोधक पथक येऊन सुमारे पाच तासांच्या प्रयत्नांनंतर बॉम्ब निकामी करण्यात आला.