मुंबईत इमारत कोसळून 10 जणांचा मृत्यू

मुंबई : प्रतिनिधी

डोंगरी येथे तांडेल स्ट्रीटवरील केसरबाई इमारत कोसळून झालेल्या दुर्घटनेत 10 रहिवासी ठार झाले असून, आठ जण जखमी आहेत. या इमारतीखाली 40 ते 50 रहिवासी दबल्याची भीती व्यक्त केली जात आहे. या दुर्घटनेची माहिती मिळताच अग्निशमन दलाचे जवान घटनास्थळी दाखल झाले व बचावकार्यास सुरुवात झाली.

डोंगरीच्या तांडेल स्ट्रीटवरील अब्दुल हमीद दर्गा येथील केसरबाई इमारत मंगळवारी (दि. 16) सकाळी 11. 30च्या सुमारास कोसळली. त्यामुळे या भागात एकच खळबळ उडाली. स्थानिकांनी तात्काळ घटनास्थळी धाव घेऊन मदतकार्यास सुरुवात केली. अग्निशमन दल आणि पोलिसांनीही धाव घेतली; तर एनडीआरएफचे पथकही घटनास्थळी रवाना झाले. संपूर्ण चार मजली इमारत कोसळल्याने सातजण ठार झाले असून, इमारतीखाली 40 ते 50 रहिवासी अडकल्याची भीती व्यक्त करण्यात येत आहे. जखमींमध्ये महिला आणि लहान मुलांचा अधिक समावेश असल्याचे स्थानिकांनी सांगितले. मातीचा ढिगारा उपसण्याचे, तसेच जखमींना बाहेर काढण्याचे प्रयत्न सुरू आहेत, मात्र अत्यंत चिंचोळ्या भागात ही इमारत असल्याने मदतकार्यात अडथळा निर्माण होत असल्याचे सूत्रांनी सांगितले. दरम्यान, ही इमारत म्हाडाची असून ही इमारत धोकादायक घोषित करण्यात आली होती.

सर्वंकष चौकशी

डोंगरी परिसरात इमारत कोसळून झालेल्या दुर्घटनेची सर्वंकष चौकशी केली जाईल. दुर्घटनास्थळी बचाव व मदतकार्यासाठी सर्वोच्च प्राधान्य दिले जात आहे, असे मुख्यमंत्री देवेंद्र फडणवीस यांनी माध्यमांशी बोलताना सांगितले.