उपमहापौर विक्रांत पाटील यांच्या हस्ते ध्वजारोहण

पनवेल : पनवेल महानगरपालिकेचे उपमहापौर विक्रांत बाळासाहेब पाटील यांच्या हस्ते विविध ठिकाणी ध्वजवंदनांचा कार्यक्रम झाला. उपमहापौर विक्रांत पाटील यांच्या पायोनिअर विभागातील जनसंपर्क कार्यालयासमोरही ध्वजवंदनाचा कार्यक्रम झाला. या वेळी त्यांनी उपस्थितांना मार्गदर्शन केले.

शिवराज प्रतिष्ठानची पूरग्रस्तांना मदत

पनवेल ः पनवेल तालुक्यातील सामाजिक कार्यात अग्रेसर असणार्‍या शिवराज प्रतिष्ठानने गडहिंग्लज तालुक्यातील ग्रामपंचायत बेलगुंदी, ग्रामपंचायत शेतापूर, ग्रामपंचायत इंचताळ येथे जाऊन येथील पूरग्रस्तांना जीवनाश्यक वस्तूंचे वाटप केले. या वेळी शिवसेना विभागप्रमुख व शिवराज प्रतिष्ठानचे विश्वास पेटकर, माजी सैनिक शरद खरांडे यांच्या सहकार्याने या जीवनावश्यक वस्तूंचे पूरग्रस्तांना वाटप करण्यात आले. या वेळी शिवराज प्रतिष्ठानचे आकाश पेटकर, संदेश पाटील, गडहिंग्लज तालुक्यातील ग्रामपंचायत सदस्य एकनाथ गवस, संजय पाटील, ओंकार खराडे, हेमंत दंडीकर, सरपंच, ग्रामसेवक व माता-भगिनी उपस्थित होते.

काळसेकर पॉलिटेक्निकमध्ये स्वातंत्र्य दिन

पनवेल ः अंजुमन-ए-इस्लाम संस्थेच्या एन. बी. ए. नामांकन प्राप्त अब्दुल रझ्झाक काळसेकर पॉलिटेक्निक, पनवेल येथे 73वा स्वातंत्र्य दिन उत्साहात साजरा झाला. संस्थेच्या लोकल मॅनेजिंग कमिटी व स्कूल कमिटीचे सदस्य इक्बाल कवारे यांच्या प्रमुख उपस्थितीत ध्वजारोहण झाले. या वेळी पनवेल नगर परिषदेचे माजी अध्यक्ष, ज्येष्ठ समाज सेवक सईद मुल्ला, पनवेल शहरातील प्रतिष्ठित मान्यवर अब्दुल हमीद पटेल, काळसेकर टेक्निकल कॅम्पसचे संचालक डॉ. अब्दुल रझ्झाक होनुटगी, फार्मसी कॉलेजचे डीन डॉ. शारिक आदी मान्यवर उपस्थित होते.