बारावीच्या विद्यार्थ्यांना आवेदनपत्र प्रदान

पनवेल ः रामप्रहर वृत्त

येथील रयत शिक्षण संस्थेच्या श्री छत्रपती शिवाजी विद्यालय व ज. आ. भगत ज्यु. कॉलेजमधील इयत्ता बारावीच्या फेब्रुवारी 2020 या परीक्षेला प्रविष्ठ होणार्‍या विद्यार्थ्यांची आवेदनपत्रे भरण्याचा शुभारंभ विद्यालयाच्या स्थानिक शाळा समितीचे चेअरमन, रयत शिक्षण संस्थेच्या जनरल बॉडी व समन्वय समितीचे सदस्य अरुणशेठ भगत यांच्या हस्ते झाला.

रयत शिक्षण संस्था आपल्या स्थापनेचे 100वे वर्ष साजरे करताना या शताब्दी महोत्सवाच्या शुभमुहूर्तावर विद्यालयाच्या प्रांगणात हा ‘आवेदनपत्र प्रदान’ समारंभ आयोजित करण्यात आला.

या वेळी बोलताना अरुणशेठ भगत यांनी विद्यालयाच्या उच्च माध्यमिक विभागाच्या उज्ज्वल यशाची परंपरा कायम राखावी, असे आवाहन करून संस्थेच्या 100व्या स्थापना वर्षानिमित्त शुभेच्छा दिल्या. त्यांच्या हस्ते विद्यार्थ्यांना प्रातिनिधिक स्वरूपात बोर्ड परीक्षेचे आवेदनपत्र प्रदान करण्यात आले.

या वेळी उपमुख्याध्यापक राजकुमार चौरे, पर्यवेक्षक दीपक भर्णुके, ज्युनिअर कॉलेज विभागप्रमुख प्रा. बी. पी. पाटोळे, रयत बँकेचे संचालक प्रमोद कोळी, लॅबप्रमुख रवींद्र भोईर, प्रा. राजू खेडकर, प्रा. राजेंद्र चौधरी, प्रा. एम. के. घरत, प्रा. उमेश पाटील, प्रा. जे. ई. ठाकूर, प्रा. अर्चना पाटील आदी मान्यवर उपस्थित होते.

कार्यक्रमाचे प्रास्ताविक व सूत्रसंचालन सागर रंधवे यांनी केले, तर प्रा. पाटोळे यांनी आभार मानले.