वाहनधारकांनी नियमांचे काटेकोर पालन करावे

जिल्हाधिकारी डॉ. विजय सूर्यवंशी यांचे प्रतिपादन

अलिबाग : जिमाका

पेण येथील उप प्रादेशिक परिवहन कार्यालय व रायगड जिल्हा पोलीसदल यांच्या संयुक्त विद्यमाने अलिबाग येथील पोलीस मुख्यालयाच्या जंजिरा सभागृहात बुधवारी (दि. 15) 31वा रस्ता सुरक्षा सप्ताह कार्यक्रम आयोजित करण्यात आला होता. वाहन चालविताना होणार्‍या अपघाताचे प्रमाण कमी करण्यासाठी वाहन धारकांनी नियमांचे काटेकोर पालन करणे आवश्यक असल्याचे प्रतिपादन जिल्हाधिकारी डॉ. विजय सूर्यवंशी यांनी या वेळी केले.

जिल्हा परिषदेचे मुख्य कार्यकारी अधिकारी दिलीप हळदे, जिल्हा पोलीस अधीक्षक अनिल पारस्कर, उप प्रादेशिक परिवहन अधिकारी उर्मिला पवार, जिल्हा वाहतूक शाखेचे सहाय्यक पोलीस निरीक्षक शहाजी शिरोळे आदी या वेळी उपस्थित होते. प्रत्येकाने वाहन चालविताना योग्य ती काळजी घेतली व नियमांचे पालन केले तर नक्कीच अपघाताचे प्रमाण कमी होईल, असा विश्वास जिल्हाधिकारी डॉ. सूर्यवंशी यांनी या वेळी व्यक्त केला. 

आपला मुलगा वाहन व्यवस्थित चालवितो किंवा नाही, हेल्मेट वापरतो की नाही हे पाहणे आईवडिलांचे कर्तव्य आहे. आपल्या जीवापेक्षा कोणतीही गोष्ट मोठी नाही. ज्यांच्याकडे टू व्हिलर आहे त्या प्रत्येकाने घरातील माणासांना वाहन चालविताना हेल्मेट वापरण्यास सांगितले पाहिजे, असे त्यांनी या वेळी सांगितले.  उप प्रादेशिक परिवहन अधिकारी उर्मिला पवार यांनी  प्रास्ताविक केले. जिल्हा परिषदेचे मुख्य कार्यकारी अधिकारी दिलीप हळदे, जिल्हा पोलीस अधीक्षक अनिल पारस्कर यांनीही रस्ता सुरक्षा सप्ताहसंदर्भात यथोचित माहिती दिली. मान्यवरांच्या हस्ते रस्ता सुरक्षा सप्ताह जनजागृती साहित्याचे प्रकाशन करण्यात आले. प्रिझम सामाजिक संस्थेने या वेळी जनजागृतीपर पथनाट्य सादर केले. सुरक्षा सप्ताहानिमित्त जिल्हास्तरीय चित्रकला स्पर्धेचे आयोजन करण्यात आले होते. या स्पर्धेतील विजेत्या स्पर्धकांना मान्यवरांच्या हस्ते प्रमाणपत्र व मानचिन्ह देऊन  सत्कार करण्यात आला. कार्यक्रमाला पोलीस विभाग व उप प्रादेशिक परिवहन अधिकारी कार्यालय पेण येथील अधिकारी, कर्मचारी आणि विविध कॉलेजचे विद्यार्थी-विद्यार्थिनी मोठ्या संख्येने उपस्थित होते.

जिल्हास्तरीय चित्रकला स्पर्धेचा गटनिहाय निकाल

इयत्ता 5 वी ते 7 वी गट

प्रथम- प्रतिक अशोक पालने-अभिनव ज्ञानमंदिर प्रशाला कर्जत.

द्वितीय सुरज लक्ष्मण वायदंडे-कोएसो जनरल अरुणकुमार वैद्य हायस्कूल अलिबाग.

तृतीय-भाग्यता अनिल देवरुखकर-जनता विद्यालय मोहोपाडा.

उत्तेजनार्थ-मदिश अब्दुल जलिल पांगरकर-अंजुमन इस्लाम ज्युनिअर हायस्कूल, मुरूड आणि सारा निलेश थळे-आरसीएफ. सेकंडरी व हायर सेकंडरी स्कूल, कुरूळ.

इयत्ता 8 वी ते 10 वी गट

प्रथम- मनोज नारायण चव्हाण-अभिनव ज्ञानमंदिर प्रशाला कर्जत.

द्वितीय- स्वराली नितेश राऊत-डेव्हीड इंग्लिश मिडीयम स्कूल चोंढी.

तृतीय- रितेन संजय मोरे-जनता हायस्कूल गडब.

उत्तेजनार्थ- श्रुती संदीप कदम-कोएसो. पार्वतीबाई महादेव भरवळ कन्या शाळा महाड, निकिता शांताराम भदे- सरनौबत नेताजी पालकर विद्यामंदिर चौक आणि श्रेया सुशिल कडीकर-डीकेईटी अलिबाग.