ड्रोनमुळे उठल्या गच्चीवरील मैफली

पनवेल : बातमीदार

लॉकडाउनमुळे घराबाहेर पडता येत नाही म्हणून सोसायटीच्या गच्चीवर जाऊन गप्पांची मैफली रंगविल्या जात आहेत. येथे सुरक्षित वावर, तोंडाला मास्क असे नियमही पाळले जात नाहीत. यामुळे पनवेल शहर पोलिसांनी ड्रोन कॅमेर्‍यांनी अशा नागरिकांवर लक्ष देण्याचे काम सुरू केले आहे. यामुळे बुधवारी आकाशात भिरभिरणार्‍या ड्रोनमुळे या गच्चीवरील मैफली उठल्या आहेत. पनवेल शहर पोलिसांनी गच्चीवर एकत्र येऊन लॉकडाऊनचे आणि आरोग्याच्या सुरक्षेचे उल्लंघन करणार्‍या नागरिकांवर नजर ठेवण्यासाठी ड्रोन कॅमेर्‍यांचा वापर सुरू केला आहे. सकाळच्या वेळी आणि सायंकाळी नागरिक गच्चीवर गप्पा मारण्यासाठी एकत्र येतात. या वेळी नियमांचे पालन केले जात नाही. याबाबत अनेक तक्रारी प्राप्त झाल्यानंतर पनवेल शहर पोलिसांनी गच्चीवर बसलेल्या नागरिकांवर ड्रोनच्या माध्यमातून नजर ठेवण्यास सुरुवात केली आहे. बुधवारी सायंकाळी पनवेल शहरातील काही भागांत ड्रोनने नजर मारली असता तरुण मुले, महिला एकत्र येऊन गच्चीवर गप्पा मारत असल्याचे निदर्शनास आले. ड्रोन कॅमेर्‍याच्या आवाजाने सगळ्यांची पळापळ झाली. एका इमारतीच्या गच्चीवर तर पाच ते सहा महिला तोंडाला मास्क न लावता, भाज्या निवडत बसल्याचे आढळले.

कुलूप लावण्याच्या सूचना

पनवेल शहर पोलिसांनी संबंधित इमारतीच्या सोसायटीच्या पदाधिकार्‍यांची भेट घेऊन इमारतीच्या गच्चीला कुलूप लावण्याच्या सूचना दिल्या. इमारतीत जाणारा दरवाजा बंद करा, अशा सूचना दिल्याची माहिती पनवेल शहर पोलीस ठाण्याचे वरिष्ठ पोलिस निरीक्षक अजय लांडगे यांनी दिली. यापुढे पनवेल शहरात करोना विषाणू बाधित क्षेत्र आणि त्या परिसरात बारकाईने नजर ठेवली जाईल, असेही त्यांनी सांगितले.