पनवेलमधील रेस्टॉरंट्स, बारसाठी नवे निर्बंध

पनवेल ः प्रतिनिधी
कोरोनाच्या वाढत्या रुग्णसंख्येच्या पार्श्वभूमीवर पनवेलमधील रेस्टॉरंट्स, कॅफे, कॅन्टीन, डायनिंग हॉल, बारवर नवे निर्बंध लागू करण्यात आले आहेत. त्यानुसार शुक्रवार, शनिवार, रविवार व शासकीय सुटीच्या दिवशी येथे सायंकाळी 7 वाजल्यानंतर केवळ पार्सल सेवा सुरू राहणार आहे. याबाबतचे निर्देश मनपा आयुक्त सुधाकर देशमुख यांनी शुक्रवारी (दि. 26) दिले आहेत.
महापालिका हद्दीत खासगी आस्थापना व मॉल्ससह सर्व प्रकारची दुकाने सायंकाळी 7 वाजेपर्यंतच सुरू राहतील. तसेच अन्य दिवशी या सेवा 50 टक्के क्षमतेसह रात्री 11 वाजेपर्यंत सुरू राहतील. अत्यावश्यक वस्तू व सेवा प्रदान करणार्‍या आस्थापना तसेच दुकानांना या प्रतिबंधातून वगळण्यात आले आहे.
दरम्यान, महापालिकेकडून घालण्यात आलेल्या या निर्देशांचे उल्लंघन झाल्यास कडक कारवाई करण्याचा इशाराही मनपा प्रशासनाने दिला आहे.