राजस्थानची केकेआरवर मात; गुणतालिकेत सहाव्या स्थानावर झेप

मुंबई ः प्रतिनिधी

भेदक गोलंदाजी आणि संजू सॅमसनच्या दमदार फलंदाजीच्या जोरावर राजस्थान रॉयल्सने आयपीएल सामन्यात केकेआरवर सहा विकेट्स राखून सहज विजय मिळवला. या सामन्यापूर्वी राजस्थानचा संघ हा तळाला आठव्या स्थानावर होता, पण शनिवारच्या सामन्यात राजस्थानने विजय मिळवला आणि गुणतालिकेत मोठा बदल झाला. राजस्थानने गुणतालिकेत आता सहावे स्थान पटकावले असून केकेआरचा संघ आठव्या स्थानावर पोहचला आहे. केकेआरच्या 134 धावांच्या आव्हानाचा पाठलाग करताना राजस्थानची सुरुवात चांगली झाली होती, पण या वेळी राजस्थानला मोठी सलामी मिळू शकली नाही. कारण केकेआरच्या वरुण चक्रवर्तीने जोस बटलरला बाद करीत राजस्थानला पहिला धक्का दिला. बटलर बाद झाल्यावरही यशस्वी जैस्वाल धडाकेबाज फलंदाजी करीत होता, पण या वेळी मोठा फटका मारण्याच्या नादात यशस्वीही बाद झाला. यशस्वीने 22 धावा केल्या. यशस्वी बाद झाल्यावर कर्णधार संजू सॅमसन आणि शिवम दुबे यांची चांगली जोडी जमली. संजू या वेळी दमदार फलंदाजी करीत होता आणि शिवम त्याला चांगली साथ देत होता, पण गरज नसताना शिवम फटकेबाजी करायला गेला आणि ही जोडी मोडली. या जोडीने दुसर्‍या विकेटसाठी 45 धावा केल्या. दुबेने 18 चेंडूंत 22 धावा केल्या. दुबे बाद झाल्यावर राहुल तेवातिया फलंदाजीसाठी आला. या वेळी संजूसारखा स्थिरस्थावर झालेला फलंदाज समोर असताना तेवातिया आक्रमण करण्यासाठी गेला आणि बाद झाला. राहुलला पाच धावांवर समाधान मानावे लागले. केकेआरची सुरुवात चांगली झाली नाही. केकेआरचा युवा सलामीवीर शुभमन गिल 11 धावांवर बाद झाला आणि त्यांना पहिला धक्का बसला. त्या वेळी केकेआरची अवस्था 1 बाद 24 अशी होती. आतापर्यंत नितीश राणा चांगल्या फॉर्मात होता, पण या सामन्यात राणाला 22 धावांवर समाधान मानावे लागले. राणा बाद झाला तरी एका बाजूने राहुल त्रिपाठी धावा जमवत होता, पण राहुलला दुसर्‍या टोकाकडून चांगली साथ मिळाली नाही. राणा बाद झाल्यावर सुनील नरिन फलंदाजीसाठी आला. नरिन मोठी फटकेबाजी करेल असे वाटत होते, पण नरिनला सहा धावांवरच समाधान मानावे लागले. त्यानंतर केकेआरचा कर्णधार इऑन मॉर्गन फलंदाजीसाठी आला, पण मॉर्गनला भोपळाही फोडता आला नाही. मॉर्गननंतर काही वेळातच केकेआरचा स्थिरस्थावर झालेला फलंदाज राहुलही बाद झाला आणि संघाला मोठा धक्का बसला. राहुलने 26 चेंडूंत एक चौकार आणि दोन षटकारांच्या जोरावर 36 धावांची खेळी साकारली.