नांदगाव हायस्कूल येथे पंचक्रोशीचा राजा विराजमान

मुरूड : प्रतिनिधी

नांदगाव हायस्कूलमध्ये मंगळवारी (दि. 17) साखरचौथ गणपती ‘पंचक्रोशीचा राजा‘ विराजमान झाला. फटाक्यांच्या आतषबाजीत व बेंजोच्या तालावर पंचक्रोशीचा राजाचे आगमन झाले. त्याच्या पूजेचा मान अशोक दहिगावकर व त्यांच्या पत्नी लता यांना मिळाला. शैलेश जोशी यांनी पौरोहित्य केले.

 या वेळी सजावटीद्वारे चांद्रयान मोहिमेची माहिती मुलांना देण्यात आली आहे. या सजावटीमध्ये जीएसएलव्ही 3 आणि प्रग्यान रोव्हरची प्रतिकृती दाखविण्यात आली आहे. सदरचा देखावा व सजावट प्रतीक पेडणेकर, विजय बनाटे व अमर दरने यांनी केली आहे. सहजीवन विद्या मंडळाचे अध्यक्ष फैरोज घलटे,  मुख्याध्यापक चिंतामणी जोशी, पर्यवेक्षक उत्तमराव वाघमोडे यांच्यासह सर्व संचालक, शिक्षक, शिक्षकेतर व विद्यार्थी मोठ्या संख्येने उपस्थित होते. या वेळी शाळेचे माजी विद्यार्थी योगेंद्र गोयजी, केदार गद्रे, निलेश बिरवाडकर, दीपक फळेभाई, गोपीचंद बाजी यांनी आठ वर्गखोल्यांकरिता पंखे भेट दिले.