हाहाकार! रायगडात 524 नवे रुग्ण; 17 जणांचा मृत्यू

पनवेल : रायगड जिल्ह्यात कोरोनाच्या एका दिवसातील सर्वाधिक 524 रुग्णांची रविवारी (दि. 19) नोंद झाली असून, 17 जणांचा बळी गेला आहे. पॉझिटिव्ह आढळलेल्या रुग्णांमध्ये पनवेल तालुक्यातील 181 (महापालिका 139 व ग्रामीण 42), पेण 92, खालापूर 82, अलिबाग 71, रोहा 27, उरण 18, कर्जत 16, माणगाव व महाड प्रत्येकी 11, म्हसळा 10, श्रीवर्धन चार आणि पोलादपूर तालुक्यातील एकाचा समावेश आहे. मृत रुग्ण पनवेल तालुक्यात पाच (मनपा चार व ग्रामीण एक), पेण चार, अलिबाग व रोहा प्रत्येकी तीन आणि खालापूर व पोलादपूर तालुक्यातील प्रत्येकी एक असे आहेत. दुसरीकडे दिवसभरात 252 रुग्ण बरे झाले आहेत. नव्या रुग्णांमुळे जिल्ह्यातील कोरोनाबाधितांचा एकूण आकडा 10 हजारांच्या वर जाऊन 10,438 इतका, तर मृतांची संख्या 277 झाली आहे.