अंगदुखीला करा बाय बाय

दिवसभराच्या ताणतणावपूर्ण कामांमुळे अनेकांना अंगदुखी अथवा शरीराच्या काही भागात तीव्र वेदना होण्याचा त्रास होत असतो. साधारणतः अशा वेदनांमुळे आरोग्याच्या समस्यादेखील निर्माण होऊ शकतात. त्यामुळे त्यावर वेळीच उपचार करणे अत्यंत गरजेचे असते. यावर उपाय म्हणून वारंवार वेदनाशामक औषधे घेण्याचेदेखील शरीरावर दुष्परिणाम होऊ शकतात. त्यामुळे अंगदुखीवर वेदनाशामक औषधांचा वापर करण्याऐवजी आयुर्वेदात सांगितलेले काही घरगुती उपाय खूपच परिणामकारक ठरतात. शरीरात कुठेही वेदना होत असतील तरी लवंग व काळीमिरी यांचा चांगला उपयोग होतो. चहा करताना त्यात पाच लवंगा आणि थोडी मिरी घालून व आले घालून केलेला चहा गरमागरम प्यायल्याने आपल्याला खूप आराम वाटतो. तसेच घसा दुखत असेल अथवा अंग दुखत असेल, तर अर्धा चमचा हळद ग्लासभर दुधातून गरम असताना प्यायल्यानेही खूप फायदा होतो.

दोन चमचे मोहरीचे तेल त्यात लसणाच्या पाच पाकळ्या टाकून गरम करावे आणि या तेलाचा मसाज तेल गरम असताना कापडाच्या बोळ्यावर घेऊन जेथे दुखते त्या जागी काही दिवस केल्यानेदेखील आपल्या वेदना कमी होतात. आल्याचे साल काढून ते गरम करावे आणि कॉटनच्या कापडात बांधून जेथे वेदना होत असतील तेथे त्याचा 10 मिनिटांपर्यंत शेक घ्यावा. असे केल्यानेही अंगदुखीत आपल्याला आराम मिळतो. दालचिनी आणि मध एक-एक चमचा कोमट पाण्यात घालून त्याचा मसाज दुखर्‍या भागावर केल्यानेदेखील आपल्याला आराम मिळतो. तसेच निलगिरी आणि आल्याची पेस्ट कॉटनच्या कपड्यात बांधून त्याचा शेक घेतल्यासदेखील आपल्याला बरे वाटते. गरम पाण्यात मीठ घालून टॉवेल भिजवून शेक घेणेही खूपच फायद्याचे ठरते. या उपचाराने अंगावर कोठे सूज आली असेल, तर तीही कमी होते. विशेषतः पाय दुखत असतील, तर हा उपचार खूपच सोपा आणि परिणामकारक ठरतो.

अंगदुखीचे अनेक प्रकार असतात. साधारण अंगदुखीत काही घरगुती उपाय केल्यास त्याचा लाभ होतो, परंतु त्यानंतरही दीर्घकाळापर्यंत अंगदुखीची समस्या कायम राहिल्यास तज्ज्ञ डॉक्टरांच्या सल्ल्यानुसार औषधोपचार करणे महत्त्वाचे आहे.