गव्हाण फाट्याजवळील कोंडी सुटणार

तीन रस्ते जोडणारा उड्डाणपुल वाहतूकीसाठी खुला; नवी मुंबईतून थेट पुणे आणि गोवा महामार्ग गाठण्यास फायदेशीर

पनवेल : रामप्रहर वृत्त

गव्हाण फाटा येथील तीन वेगवेगळ्या रस्त्यांना जोडणारा हाफ क्लोअरलिफ्ट इंटरटेन प्रकारचा उड्डाणपूल शुक्रवारी (दि. 19) वापरासाठी खुला करण्यात आला. माजी खासदार लोकनेते रामशेठ ठाकूर यांच्या हस्ते या पूलाचे लोकार्पण करण्यात आले. आमदार महेश बालदी यांच्या सातत्यपूर्ण पाठपुराव्यातून हा उड्डाणपूल उभारण्यात आला आहे. या रस्त्यामुळे गव्हाण फाट्याजवळील कोंडी सुटणार आहेच, याशिवाय उरण फाट्याहून विनाअडथळा पुणे आणि गोवा महामार्ग गाठता येणार आहे.

नवी मुंबईच्या विमानतळावर विमानांचे उड्डाण होऊ लागल्यानंतर या भागात दररोज एक लाख वाहनांची वर्दळ असेल, असा अंदाज बांधण्यात आला आहे. त्यामुळे जेएनपीटी, राष्ट्रीय राजमार्ग प्राधिकरण आणि सिडको या तीन प्राधिकरणांनी एकत्रितपणे दोन हजार 936 कोटी रुपये खर्च करून विमानतळाच्या चारही सीमाभागातील रस्ते विकसित करण्याचे काम 2014 पासून सुरू आहे. पॅकेज वन आणि पॅकेज टू अशा दोन टप्प्यांत 44 किलोमीटर रस्त्याचे जाळे मजबूत करण्यात आले. अशोका बिल्डकॉन, जेकुमार आणि पनवेलच्या जेएमएमआयपीएल कंपनीला या कामांचे एकत्रित कंत्राट देण्यात आले होते. या कामातील महत्त्वाचा समजला जाणार्‍या गव्हाण फाटा येथील उड्डाणपुलाचे काम पूर्ण झाले असून तो शुक्रवारी वाहतुकीसाठी सुरू करण्यात आला.

नवी मुंबईतून सायन-पनवेल महामार्गावरून उरण फाट्यावरून किल्ले जंक्शन येथून सुरू होणारा हा रस्ता गव्हाण फाटा येथे तीन वेगवेगळ्या मार्गिकांवर जाऊन संपतो. किल्ले जंक्शन येथून गव्हाण फाट्यापर्यंत उड्डाणपूल असून जेएनपीटी, पनवेल आणि उरणच्या दिशेने या रस्त्याने जाता येणार आहे. उरणकडून जुन्या मार्गाने आल्यास पनवेलकडे जाण्याच्या मार्गाला लागता येते. नवी मुंबईत थेट पामबीच मार्गावरही या रस्त्याने जाता येते. एवढेच नव्हे तर जेएनपीटी महामार्ग जुन्या मुंबई-पुणे महामार्गावर संपत असल्यामुळे थेट पुण्याला जाणारी वाहने, पळस्पे फाट्यावरून मुंबई गोवा महामार्गाने कोकणात जाणार्‍या वाहनांना हा नवा उड्डाणपूल सोयीचा ठरणार आहे. पॅकेज 2 मधील हे महत्त्वाचे काम संपल्यामुळे जेएनपीटी बंदरामुळे आणि भविष्यात विमानतळामुळे रस्त्यावर येणारी अवजड वाहनांची कोंडी उड्डाणपुलामुळे सुटणार आहे. मुख्यत्वे हा पूल अवजड वाहनांच्या सोयीसाठी बांधण्यात आल्याचे राष्ट्रीय राजमार्ग प्राधिकरणाचे कार्यकारी अभियंता प्रशांत फेगडे यांचे म्हणणे आहे.

2014 मध्ये सुरू झालेल्या या कामातील 44 किलोमीटरच्या एकूण प्रकल्पातील आता चिरनेर फाट्यासमोरील एका उड्डाणपुलाच्या कामाचा शेवटचा टप्पा शिल्लक आहे. हे काम पूर्ण झाल्यास दोन हजार 936 कोटी रुपयांच्या एनएचएआय, सिडको आणि जेएनपीटी यांनी एकत्र येऊन सुरू केलेल्या प्रकल्पाचे काम पूर्ण होणार आहे.