महाड आगाराच्या नव्या इमारतीचे काम रखडले

महाड ़: प्रतिनिधी

मुंबई-गोवा महामार्गावरील महाड एसटी आगार व बसस्थानकाच्या इमारतीचे बांधकाम निधीचा अभावी आणि ठेकेदाराने केलेल्या कामाचे थकीत बिल यामुळे गेल्या वर्षापासून ठप्प झाले आहे. यामुळे प्रवासी व कर्मचार्‍यांना जुन्या धोकादायक इमारतीत वावरावे लागत आहे.

महाड बसस्थानक व आगाराची इमारत 50 वर्षे जुनी आहे. बसस्थानकाच्या इमारतींमध्ये असणारे उपहार गृह, बुक स्टॉल, स्नॅक्स दुकाने, आरक्षण कक्ष, कर्मचारी कक्ष तसेच चालक व वाहक यांच्यासाठी असलेले विश्रामगृह याच जुन्या इमारतीमध्ये आहेत. मात्र  ही इमारत आता जुनी झाल्याने धोकादायक बनली आहे.

मुंबई-गोवा महामार्गावरील महाड आगार व बसस्थानक हे मध्यवर्ती ठिकाण आहे. या स्थानकातून दररोज शेकडो गाड्यांची ये-जा होत असते. कोकण, पश्चिम महाराष्ट्र, मुंबई, पुणे तसेच विविध ठिकाणी जाणार्‍या बसेस या ठिकाणी थांबत असतात. तसेच महाड आगारात गाड्यांची दुरुस्ती, इंधन भरणे कामदेखील होत असते, मात्र ही इमारत धोकादायक झाल्याने प्रवासी व कर्मचार्‍यांच्या जीविताला धोका निर्माण झाला आहे. या इमारतीचे बांधकाम नव्याने करण्यासाठी सातत्याने पाठपुरावा केल्यानंतर तीन वर्षापुर्वी फडणवीस सरकारच्या काळात तिच्या बांधकामाला मान्यता मिळाली. यानंतर महाड बस स्थानकाच्या जवळील मोकळ्या जागेत बांधकाम सुरू झाले असले तरी सरकार बदलताच अल्पावधीतच हे काम ठप्प झाले आहे.

या इमारतीचे बांधकाम ठप्प झाल्यामुळे जुन्या धोकादायक इमारतीमध्ये प्रवासी, नागरिक तसेच येथील दुकानदारांना आसरा घ्यावा लागत आहे. या इमारतीच्या बांधकामासाठी चार कोटी 47 लाख रुपये अंदाजित खर्च असून चांगल्या दर्जाचे बसस्थानक व आगाराची इमारत या ठिकाणी होणार आहे. परंतु ठेकेदाराला उर्वरित रक्कम व त्याने केलेल्या कामाची रक्कम मिळत नसल्याने काम ठप्प झाले आहे. याठिकाणी सुमारे एक कोटीहून अधिक रकमेचे काम झाले असले तरी कामासाठी निधी वर्ग न झाल्याने महाड बस स्थानक व आगाराचे काम ठप्प झाले आहे.

राज्य परिवहन मंडळाच्या वरिष्ठ कार्यालयातून यासाठी निधी मंजूर केला जात असतो. ठाकरे सरकारची विकासकामांची स्थगिती आणि लॉकडाऊनमुळे एसटी  महामंडळाला बसलेला फटका पाहता महाड आगाराच्या इमारतीला निधी कधी वर्ग होणार हा प्रश्न निर्माण झाला आहे.

महाडमध्ये सुमारे सहा कोटी रुपये खर्चून नवीन इमारत बांधण्यात येणार आहे. तत्कालीन खासदार अनंत गीते, पालकमंत्री रवींद्र चव्हाण यांच्या हस्ते 7 मार्च 2019 रोजी या कामाचे भूमिपूजन करण्यात आले होते. पुर्णावस्थेकडे चाललेल्या इमारतीचे काम सद्या निधी अभावी ठप्प आहे. महाड आगाराकडे एकरमध्ये जमीन उपलब्ध आहे.

महामार्गाला लागूनच असलेली जमीन मोकळी असून मधील भागात आगाराची आणि स्थानकाची जुनी इमारत, तर मागील बाजूस कार्यालय आणि मेकॅनिकॅल यंत्रणा आहे. ज्या ठिकाणी जुनी इमारत आहे, त्या जागेत इमारतीचे बांधकाम न करताच मधोमध इमारत बांधून जुनी इमारत तशीच ठेवण्यात आली आहे.

दगडी कामातील जुनी इमारत आजही शाबूत आहे. हीच इमारत दुरुस्त झाली असती तर कोट्यवधी रुपये वाचले असते, असेही सांगितले जात आहे.

निधी नसल्याने महाड एसटी आगाराच्या इमारतीचे काम सध्या थांबलेले आहे. ठेकेदाराने  केलेल्या कामाचे बिल सादर केले आहे. कोरोना आणि त्यानंतर वाढलेले दर यामुळे पुन्हा वाढीव दराची मागणी झाली आहे, निधी वर्ग होताच काम पुन्हा सुरू केले जाईल.

-रोहिदास कांबळे, उपअभियंता एसटी अभियांत्रिकी विभाग