नावडे फाटा उड्डाणपुलाचे काम पूर्ण

आमदार प्रशांत ठाकूर यांचे विशेष प्रयत्न; वाहतूककोंडी सुटणार

पनवेल ः वार्ताहर

तळोजा औद्योगिक क्षेत्रात जाण्यासाठी नावडे फाटा येथे उभारण्यात आलेल्या उड्डाणपुलाचे बांधकाम पूर्ण झाले आहे. येत्या आठवड्याभरात पूल वाहतुकीसाठी खुला केला जाण्याची शक्यता आहे. या उड्डाणपुलामुळे वाहतूक कोंडीतून सुटका होणार असल्यामुळे नावडे परिसरातील रहिवासी समाधान व्यक्त करत आहेत. आमदार प्रशांत ठाकूर यांच्या विशेष प्रयत्नातून हा पूल मार्गस्त होत आहे. पनवेल-मुंब्रा मार्गावर अवजड वाहनांची नेहमी वर्दळ असते. त्यात नावडे फाटा येथून तळोजा औद्योगिक क्षेत्रात जाण्यासाठी एकमेव मार्ग असल्यामुळे नावडे फाट्यावर नेहमी वाहतूककोंडी होते. त्यामुळे 3 वर्षांपूर्वी 70 कोटी रुपये खर्च करून एमएसआरडीसीने नावडे फाटा येथे उड्डाणपुलाचे बांधकाम सुरू केले. दोन वर्षात काम पूर्ण करून पूल वाहतुकीसाठी खुला करण्याचा संकल्प करण्यात आला होता. मात्र कोरोनामुळे लागू करण्यात आलेली टाळेबंदी आणि नावडे ग्रामस्थांना गावातून बाहेर पडण्यासाठी भुयारी मार्गाचे काम हाती घेण्यात यावे, यासाठी ग्रामस्थांनी केलेल्या आंदोलनामुळे काही दिवस उड्डाणपुलाचे काम बंद होते. अखेर नावडे गावालगत पादचारी भुयारी मार्ग उभारण्याचा निर्णय घेवून सुरु झालेले उड्डाणपुलाचे बांधकाम पूर्ण झाले. आमदार प्रशांत ठाकूर यांनी या पूलासाठी विशेष प्रयत्न केले आहेत. यामुळे रहिवाशांमध्ये समाधान व्यक्त होत आहे. उड्डाणपुलावर दोन्ही बाजूला जवळपास 90 पथदिवे उभारण्यात आले आहेत. उडाणपुलाचे काम पूर्ण झाल्यामुळे नावडे फाटा येथे होणार्‍या वाहतूक कोंडीचा प्रश्न सुटणार आहे. यामुळे नावडे परिसरातील रहिवासी यांच्यासह वाहन चालक समाधान व्यक्त करीत आहेत. दरम्यान, नावडे फाटा येथील उड्डाणपुलाचे बांधकाम पूर्ण झाले आहे. येत्या आठवडाभरात पूल वाहतुकीसाठी खुला करण्यात येणार आहे, असे एमएसआरडीसी अधिकार्‍यांनी सांगितले. नावडे उड्डाणपुलामुळे थेट येणारी वाहने रोडपाली सिग्नलवर थांबणार आहेत. त्यामुळे चारही बाजूने येणार्‍या वाहनांमुळे सदर सिग्नलवर वाहतूक कोंडी होणार आहे. त्यामुळे शासनाने रोडपाली सिंग्नलवर उड्डाणपुल उभारावा, या मागणीचे पत्र नवी मुंबई पोलीस उपायुक्त यांच्याकडून शासनाकडे पाठविण्यात आले आहे.

नावडे फाटा येथील उड्डाणपुलामुळे स्थानिक ग्रामस्थांची वाहतूक कोंडीतून सुटका होणार आहे. नावडे फाटा दरम्यान वाहतूक सुरळीत होणार आहे. नावडे गाव समोरील रोडपाली सिंग्नलवर वाहतूककोंडी होण्याची शक्यता  असून, शासनाने सदर ठिकाणी उड्डाणपूल उभारणे आवश्यक आहे.

-महेश पाटील, वरिष्ठ पोलीस निरिक्षक, तळोजा वाहतूक विभाग