माथेरानच्या शारलोट लेकमधील गाळ काढावा

मनसेचे जीवन प्राधिकरणचे उपअभियंता भोसले यांना निवेदन

कर्जत : बातमीदार

माथेरानला पाणीपुरवठा करणार्‍या शारलोट लेक तलावातील गाळ काढावा, अशी मागणी मनसेचे शहर अध्यक्ष संतोष कदम यांनी महाराष्ट्र जीवन प्राधिकरणाचे कर्जतचे प्रभारी उपअभियंता सुरेंद्र भोसले यांच्याकडे निवेदनाद्वारे केली.

माथेरान शहर मनसेच्या शिष्टमंडळाने नुकताच महाराष्ट्र जीवन प्राधिकरणाचे कर्जत प्रभारी उपअभियंता सुरेंद्र भोसले यांची त्यांच्या पनवेल येथील कार्यालयात भेट घेऊन निवेदन दिले. त्यात म्हटले आहे की, माथेरानचा शारलोट लेक तलावाची साफसफाई पुर्वी  दर दोन वर्षांनी केली जात होती, मात्र गेल्या वर्षांपासून साफसफाई न केल्याने या तलावातील पाण्याची पातळी मोठ्या प्रमाणात कमी झाली आहे. त्याचा परिणाम पाणीपुरवठ्यावर होत आहे. तसेच तलावातील गाळामुळे शहरात दूषित पाणीपुरवठा होत असून नागरिकांचे आरोग्य धोक्यात आले आहे.

या वर्षी शारलोट लेक साफ केला नाही, तर मनसे स्टाइलने आंदोलन केले जाईल,  इशारा या वेळी संतोष कदम यांनी दिला. या तलावातील गाळ काढण्याचा प्रस्ताव तयार करून वरिष्ठांना पाठविण्यात येईल, असे  प्रभारी उपअभियंता भोसले यांनी या वेळी सांगितले. मनसे कार्यकर्ते आशिफ खान, रवींद्र कदम, भुषण सातपुते सचिन घाग, किसन चौधरी या वेळी उपस्थित होते.

माथेरानच्या पाणीपुरवठ्या संदर्भात या वेळी चर्चा करण्यात आली. माथेरानमध्ये जीवन प्रधिकरणाचा अभियंता नसल्याने येथील नागरिकांना पाणी किंवा बिलासंबंधी काही तक्रारी असल्यास कर्जत येथे जावे लागते. ही बाब खर्चिक असून सामान्य नागरिकांना त्रासदायक आहे. निविदेत अठरा महिन्याची मुदत असतांना ठेकेदाराकडून आजही वाढीव नळपाणी योजनेचे काम पुर्ण झालेले नाही, त्यामुळे ठेकेदारावर कारावाई करावी, अशी मागणी संतोष कदम यांनी या वेळी केली.  ठेकेदारावर दंङ आकारणी केली असून पुढील कारवाई करता वरिष्ठांना पत्रव्यवहार करणार असल्याचे भोसले यांनी सांगितले.

लवकर माथेरानचा पाणीपुरवठा सुरळीत करून माथेरान करांना शुध्द पाणी दिले जाईल तसेच निवृत्त अभियंता किशोर देशमुख यांची पुन्हा शाखाअभियंता म्हणून नेमणूक करण्यात येईल.

-सुरेंद्र भोसले, प्रभारी उपअभियंता, महाराष्ट्र जीवन प्राधिकरण, कर्जत