पारदर्शक कारभारासाठी पनवेल मनपाचे पाऊल

सर्व पावत्या मिळणार पॉस मशीनच्या माध्यमातून

पनवेल ः प्रतिनिधी

महापालिकेतील विविध विभागांतील दंड, कराच्या पावत्या आता 100 टक्के पॉस मशीनच्या माध्यमातून घेतले जात आहेत. छापील पावती पुस्तके पूर्णत: बंद करण्यात आली असून, पारदर्शक कारभाराच्या दिशेने महापालिकेने महत्वाचे पाऊल टाकले असल्याची माहिती आयुक्त गणेश देशमुख यांनी दिली. विभाग प्रमुखांच्या मंगळवारी (दि. 26) झालेल्या बैठकीत पॉस मशीनचा आढावा आयुक्त गणेश देशमुख यांनी घेतला. गेल्या सहा महिन्यांपासून आयुक्तांनी महापालिकेतील पावती पुस्तकांचा वापर बंद करून पॉस मशीनच्या माध्यमातून दंड, करवसुली करावी याकडे जातीने लक्ष घातले होते. आयुक्तांनी सातत्याने यामध्ये येणार्‍या त्रुटींमध्ये सुधारणा व्हावी यासाठी प्रयत्न करून प्रोत्सहन दिले. सध्या प्रभाग समिती, रोज बाजार, स्वच्छता मार्शल्स पॉस मशीनच्या माध्यमातून दंड, करवसुली करीत असून छापील पावती पुस्तकांच्या माध्यमातून करण्यात येणारी वसुली पूर्णत: बंद करण्यात आली आहे. 88 पॉस मशीन्सचा माध्यमातून सर्व कर व दंडवसुली चारही प्रभाग समितीमध्ये केली जात आहे. लेखा विभागाच्या या कामगिरीबद्दल मुख्य लेखा अधिकारी मंगेश गावडे व लेखा विभागाच्या संपूर्ण टिमचे आयुक्तांनी अभिनंदन केले तसेच नागरिकांनी महापालिकेचा कोणताही दंड, कर देताना छापील पावतीचा स्वीकार न करता पॉस मशीनद्वारे मिळणार्‍या पावतीचीच मागणी करावी, असे आवाहन महापालिकेच्यावतीने करण्यात आले आहे. याबरोबरच महापालिका क्षेत्रात सुरू असलेल्या आणि नव्याने सुरू करण्यात येणार्‍या विविध विकास कामाचा आढावा घेऊन ही कामे गतीने पूर्ण करण्याच्या सूचना आयुक्तांनी विभाग प्रमुखांच्या बैठकीत अधिकार्‍यांना दिल्या. या वेळी अतिरिक्त आयुक्त तृप्ती सांडभोर, सहाय्यक संचालक नगररचना ज्योती कवाडे, उपायुक्त गणेश शेटे, उपायुक्त कैलास गावडे, उपायुक्त कल्पिता पिंपळे, शहर अभियंता संजय जगताप, मुख्य लेखा अधिकारी मंगेश गावडे, मुख्य वैद्यकीय अधिकारी डॉ. आनंद गोसावी, मुख्य लेखा परिक्षक विनयकुमार पाटील, लेखा अधिकारी संग्राम व्हारेकाटे, सहाय्यक आयुक्त डॉ. वैभव विधाते, सहाय्यक आयुक्त सुवर्णा दखणे यांच्यासह सर्व विभांगाचे विभाग प्रमुख, अधिकारी उपस्थित होते.

महापालिकेला बँक ऑफ इंडियाचे सहकार्य लाभले असून वर्ल्ड लाईन इंडिया प्रायव्हेट लिमिटेड या कंपनीच्या 88 पॉस मशीन्सचा माध्यमातून सर्व कर व दंडवसुली चारही प्रभाग समितीमध्ये केली जात आहे.