माणगावजवळ ओढ्यात आढळली बेवारस कार

माणगाव : प्रतिनिधी
माणगाव तालुक्यातील चांदोरे गावाच्या हद्दीत ओढ्यामध्ये बेवारस स्थितीत पडलेली एक कार पोलीस व रेस्क्यू टीमने मंगळवारी (दि. 16) क्रेनच्या सहाय्याने बाहेर काढली. बेवारस स्थितीत ओढ्यामध्ये सापडलेल्या या कारबद्दल  नागरिकांत चर्चा रंगल्या आहेत.
चांदोरे गावच्या हद्दीतील ओढ्यात एक कार (एमएच 14-डीएफ 4167) पडली असल्याची माहिती ग्रामस्थ सुजित शिंदे यांनी मंगळवारी सकाळी 10 वाजता दूरध्वनीवरून माणगाव पोलिसांना दिली. त्यानंतर उपविभागीय पोलीस अधिकारी प्रवीण पाटील, निरीक्षक राजेंद्र पाटील व पथकाने घटनास्थळी तातडीने जाऊन पाहणी केली. त्या वेळी त्यांना पांढर्‍या रंगाची गाडी ओढ्यात अर्धवट बुडालेल्या अवस्थेत दिसली. ही कार रेस्क्यू टीमच्या विशेष मदतीने व क्रेनच्या सहाय्याने पाण्याबाहेर काढण्यात आली. पोलीस या गाडीची अधिक चौकशी करीत आहेत.