कर्जत रेल्वेस्थानकातील मुख्य पादचारी पूल बंद केल्याने प्रवासी, नागरिकांचे हाल

कर्जत : प्रतिनिधी

कर्जत रेल्वे स्थानकातील पुणे बाजूकडील मुख्य पूल तांत्रिक कामानिमित्त मंगळवार (दि. 20) पासून तब्बल महिनाभर बंद करण्यात आला आहे. त्यामुळे दोन, तीन व ईएमयू फलाटावर जाणार्‍या व येणार्‍या  प्रवाशांबरोबरच भिसेगाव, गुंडगे परिसरातील नागरिकांची गैरसोय होत असून, ते शॉर्टकट म्हणून रूळ ओलांडताना अपघात होण्याची शक्यता आहे. कर्जत हे मुंबई-पुणे दरम्यानचे मुख्य रेल्वे स्थानक आहे. त्यामुळे या स्थानकावर प्रवाशांची खूप गर्दी असते. या रेल्वेस्थानकातून रोज हजारो विद्यार्थी, चाकरमानी, व्यावसायिक प्रवास करीत असतात. या स्थानकात असलेल्या पुणे बाजूकडील पुलाचे तांत्रिक काम निघाल्याने हा पूल मंगळवारपासून पूर्णपणे बंद केला आहे. त्यामुळे रोज घाईघाईने गाडी पकडण्यासाठी जाणार्‍या प्रवाशांचे अतोनात हाल सुरू झाले आहेत, तसेच पलिकडच्या बाजूला भिसेगाव, गुंडगे ही नगर परिषद हद्दीतील गावे आहेत. या स्थानकाच्या पूर्व बाजूला असलेली तिघर, वर्णे, पळसदरी, वावर्ले, खैराट, बोरगाव, हातनोली, चौक आदी गावातील प्रवासी रिक्षा किंवा एसटीने येतात, त्यांना हा पादचारी पूल सोईस्कर आहे. त्यांना या पुलावरूनच कर्जत बाजारपेठेत यावे-जावे लागते. पर्यायी मार्गाने यायचे झाल्यास सुमारे दोन किलोमीटरचा वळसा घ्यावा लागतो.कर्जत रेल्वेस्थानकातील पादचारी पूल सुमारे महिनाभर बंद राहणार आहे. त्यासाठी पर्यायी मार्गाने मुंबई बाजूकडील पुलाचा वापर करायचा ठरवल्यास फलाटावरून जाताना विनातिकीट म्हणून पकडले जाण्याची शक्यता आहे. लांब पल्ल्याच्या गाड्या एक नंबर फलाटावर येतात, मात्र कधी कधी त्या दोन किंवा तीन नंबर फलाटावर आणाव्या लागतात. त्यावेळी प्रवाशांचे होणारे हाल बघवत नाहीत, तर लांब पल्ल्याच्या पुण्याकडून येणार्‍या गाड्या दोन किंवा तीन नंबर फलाटावर येतात,  त्यांची खूप गैरसोय होते. त्यातच कर्जतहून खोपोलीकडे जाणार्‍या व  खोपोलीहून कर्जतला येणार्‍या लोकल दोन, तीन नंबरच्या फलाटावर येतात. तर मुंबईहून कर्जतला येणार्‍या बहुतांश लोकल ईएमयू फलाटावर किंवा दोन किंवा तीन नंबरच्या फलाटावर येतात. त्या प्रवाशांचे कुटुंब कबिल्यासह येता-जाता खूपच हाल होत आहेत. हा पूल एक महिन्यासाठी बंद केला असल्याचे रेल्वे प्रशासनाने जाहीर केले आहे, मात्र एक महिन्यात तरी काम होईल ना? असा प्रश्न उपस्थित होत आहे. हा पूल नव्याने बांधला आहे मग हा पूल बंद का करण्यात आला आहे? पनवेल साठी वेगळी लाईन टाकण्यासाठी हा पूल बंद करण्यात आला आहे काय? असे प्रश्नही उपस्थित होत आहेत.

काही कामासाठी पुणे बाजूकडील पूल 30 दिवसांसाठी बंद करण्यात आला आहे, तोपर्यंत लोकल गाड्या एक नंबर फलाटावर आणाव्यात, म्हणजे प्रवाशांचा त्रास थोडा कमी होईल.

-पंकज ओसवाल, सामाजिक कार्यकर्ते, कर्जत

कर्जत रेल्वे स्थानकातील पूल कामानिमित्त बंद करण्यात आला आहे. त्यामुळे आमच्यासारख्या आजारी असलेल्या ज्येष्ठ नागरिकांना खूप त्रास सहन करावा लागत आहे. रेल्वेने नियम थोडा बाजूला ठेऊन पर्यायी मार्ग केल्यास आमची थोडीतरी सोय होईल.

-प्रभाकर करंजकर, नागरिक, कर्जत