चौक परिसरात रविवारी विकासकामांचा शुभारंभ

आमदार प्रशांत ठाकूर व महेश बालदी यांच्या हस्ते होणार भूमिपूजन

चौक : प्रतिनिधी
खालापूर तालुक्यातील चौक परिसरात विविध विकासकामांचा शुभारंभ आमदार प्रशांत ठाकूर व आमदार महेश बालदी यांच्या हस्ते रविवारी (दि. 2) होत आहे. सकाळी 10 वाजता लोधिवली येथून या कार्यक्रमास सुरुवात होणार आहे.
उरण विधानसभा मतदारसंघाचे आमदार महेश बालदी यांच्या प्रयत्नाने व भाजपचे जिल्हा उपाध्यक्ष सुधीर ठोंबरे यांच्या पाठपुराव्याने मंजूर झालेल्या विकासकामांचे भूमिपूजन रविवारी होत आहे. ठोंबरे यांनी सुचवलेली व पाठपुरावा केलेली कामे आमदार महेश बालदी यांच्या प्रयत्नाने मंजूर करण्यात आली आहेत.
लोधिवली येथे अंतर्गत रस्ते तयार करणे, तुपगाव स्मशानभूमी रस्ता व जलजीवन योजनेंर्तगत नळ पाणीपुरवठा योजना, हातनोली येथे गणेश घाट रस्ता, वावंढळ, कलोते, पोखरवाडी, आंबेवाडी व काटवन येथे रस्ता, तर ताडवाडी, चिचमाळ, निगरपट्टी, निंबारवाडी, दांडवाडी, बुरुजवाडी, बापदानपाडा येथे नळ पाणीपुरवठा योजनांचा शुभारंभ करण्यात येणार आहे. या विविध विकासकामांमुळे परिसरातील ग्रामस्थांमध्ये आनंद व्यक्त केला जात आहे.