दै. रामप्रहरचे मुख्य संपादक देवदास मटाले यांना स्व. संतोष पवार स्मृती राज्यस्तरीय पुरस्कार प्रदान

कर्जत : प्रतिनिधी
कर्जत प्रेस क्लबच्या वतीने दिला जाणारा स्व. संतोष पवार स्मृती राज्यस्तरीय संपादक पुरस्कार दैनिक रामप्रहरचे मुख्य संपादक देवदास मटाले यांना गुरुवारी (दि. 27) माजी आमदार सुरेश लाड यांच्या हस्ते प्रदान करण्यात आला. 11,111 रुपयांचा धनादेश, समानचिन्ह, मानपत्र, शाल, श्रीफळ असे या पुरस्काराचे स्वरूप आहे, तर रायगड जिल्हास्तरीय पत्रकार पुरस्कार अलिबाग येथील रायगड टाईम्सचे संपादक राजन वेलकर यांना देण्यात आला.
कर्जत येथील रॉयल गार्डनच्या वातानुकूलित सभागृहात पुरस्कार वितरण सोहळ्याचे आयोजन स्व. संतोष पवार यांच्या जयंती दिनाचे औचित्य करण्यात आले होते. या सोहळ्यास कर्जतच्या नगराध्यक्ष सुवर्णा जोशी, माथेरानचे माजी नगराध्यक्ष मनोज खेडकर, ज्येष्ठ पत्रकार दिलीप मालवणकर, जिल्हा माहिती अधिकारी मनोज सानप, स्व. संतोष पवार यांच्या मातोश्री सुशीला पवार, रंजना धुळे, मराठी पत्रकार परिषद कार्याध्यक्ष मिलिंद अष्टीवकर, रायगड प्रेस क्लबचे अध्यक्ष मनोज खांबे, आदी उपस्थित होते.
या वेळी आमदार सुरेश लाड म्हणाले की, पत्रकार असतानादेखील आपल्या आयुष्यात आदर्श पत्रकारिता करीत स्व. संतोष पवार यांनी समाजासमोर एक वेगळा आदर्श ठेवला. माणसांचा संच करणारा हा माणूस मित्र म्हणूनदेखील आदर्शच होता. माथेरानच्या जडणघडणीत त्याचा वाटा होता. एक जिंदादिल व्यक्तिमत्व असणारे संतोष पवार आपल्यात नाहीत हे शल्य कायम आहेच. त्यांच्या नावाने आज पुरस्कार्थींना पुरस्कार मिळणे हे खर्‍या अर्थाने भाग्याचे आहे.
सत्काराला उत्तर देताना ‘रामप्रहर’चे संपादक देवदास मटाले यांनी, संतोष पवार माथेरानसाठी सर्वस्व पणाला लावणारा पत्रकार होता. येथील पत्रकारांनी त्यांच्यासारखी पत्रकारिता करणे आवश्यक आहे’ असे स्पष्ट केले.
नगराध्यक्ष सुवर्णा जोशी, माजी नगराध्यक्ष मनोज खेडकर, रायगड टाईम्सचे संपादक राजन वेलकर यांनीही स्व. संतोष पवार यांच्याप्रति असलेल्या आपल्या भावना व्यक्त केल्या.
कार्यक्रमास माजी नगराध्यक्ष अजय सावंत, राजेश लाड, माजी उपनगराध्यक्ष आकाश चौधरी, माजी गटनेते प्रसाद सावंत, नितीन कांदळगावकर, मधुकर घारे, बळवंत घुमरे, प्रभाकर पवार, मीना प्रभावळकर, प्रवीण सकपाळ, अंकुश दाभणे, दिलीप गडकरी, वसंत मोधळे, पराग बोरसे, प्रसाद पाटील, प्रशांत गोपाळे, वसंत ठाकूर, सुरेश कुरतडकर, हनुमंत भांगे, राहुल वैद्य, पूजा सुर्वे, डॉ. मोहन काळे, अशोक शिंदे, राजाभाऊ कोठारी, डॉ. प्रशांत सदावर्ते आदी उपस्थित होते.
कर्जत प्रेस क्लबचे अध्यक्ष राहुल देशमुख यांनी स्वागत करून प्रास्ताविक केले. सूत्रसंचालन प्रेमानंद गोसावी यांनी केले, तर सचिव दीपक पाटील यांनी उपस्थितांचे आभार मानले.