कामोठे बसथांब्याचे स्थलांतर व्हावे

सिटीझन्स युनिटी फोरमची मागणी; रखडलेले डावे वळणाचे काम पूर्ण

पनवेल : बातमीदार

कामोठ्यातील बाहेर पडून मुंबईच्या दिशेने जाणार्‍या पनवेल-सायन मार्गावरील काम पूर्ण झाल्यामुळे कळंबोली आणि कामोठे वसाहतीच्या मधे असलेला थांबा कामोठ्याच्या पुलाजवळ नेण्यात यावा, अशी मागणी सिटिझन्स युनिटी फोरमच्या कामोठे शाखेने केली आहे. अनेक वर्षे रखडलेले कामोठ्याचे डावे वळण पूर्ण झाल्यामुळे बसथांबा पुढे नेण्याची गरज निर्माण झाली आहे.

पनवेल-सायन महामार्गाचे रुंदीकरण होऊन पाच वर्षे उलटली, तरी कामोठ्यातून बाहेर पडून मुंबईकडे जाणार्‍या मार्गाचे काम वनविभाग, पर्यावरण आणि सार्वजनिक बांधकाम विभागाच्या वादात रखडले होते. काही महिन्यांपूर्वी एक मार्गिका सुरू झाल्यानंतर आता कामोठ्यातून बाहेर पडून मुंबई, नवी मुंबईकडे जाणार्‍या रस्त्याच्या तीनही मार्गिकांचे काम पूर्ण झाले आहे. पाच वर्षांपूर्वीपासून रखडलेले काम पूर्ण झाल्यामुळे कामोठ्यातील रहिवाशांसाठी ही सोयीची बाब ठरली आहे. मात्र रुंदीकरण झाल्यानंतर रस्ता नसल्यामुळे कळंबोली आणि कामोठे बसथांब्याच्या मधेच व्यंकट हॉटेलजवळ नवा बसथांबा अस्तित्वात आला होता. आता हा बसथांबा आवश्यक ठिकाणी म्हणजे कामोठ्यातून बाहेर पडणार्‍या मुख्य रस्त्याजवळ नव्या डाव्या वळणावर आणण्याची गरज आहे. रस्ता तयार होऊनही बसथांबा जुन्या ठिकाणी असल्यामुळे प्रवाशांना जुन्या बसथांब्यावर पायपीट करीत जावे लागते. त्यामुळे कामोठे उड्डाणपुलाखालील नव्या ठिकाणी बसथांबा उभारावा, अशी मागणी सिटिझन्स युनिटी फोरमच्या कामोठे शाखेच्या सचिव रंजना सडोलीकर यांनी पनवेल एसटी आगाराचे व्यवस्थापक, बेस्ट उपक्रमाचे व्यवस्थापक आणि एनएमएमटीचे महाव्यवस्थापक या तीनही सार्वजनिक बसवाहतूक सेवेच्या प्रमुखांना पत्र लिहून केली आहे.