सरसगडाने घेतला मोकळा श्वास ; ट्रेकिंग पलटन ग्रुपतर्फे स्वच्छता मोहीम फत्ते

पाली ः प्रतिनिधी

ट्रेकिंग पलटन ग्रुप पुणेतर्फे सुधागड तालुक्यातील सरसगडावर नुकतीच स्वच्छता मोहीम राबविण्यात आली. या वेळी ग्रुपच्या सदस्यांनी

सरसगडावरील प्लास्टिक कचरा गोळा केला. यात बाटल्या, ग्लास, फूड पॅकेट्स, पॉलिथिन बॅग असा पर्यावरणास घातक कचरा उचलून गडाचा परिसर स्वच्छ करण्यात आला. गडकिल्ले संवर्धनासाठी दुर्गप्रेमी झपाटून काम करताना दिसत आहेत. गडकिल्लेरूपी ऐतिहासिक ठेवा जतन व्हावा याकरिता ट्रेकिंग पलटण ग्रुप मागील अनेक वर्षांपासून कार्यरत आहे.

  ट्रेकिंग पलटन ग्रुपची ही तीन वर्षांतील 22वी स्वच्छता मोहीम आहे. बल्लाळेश्वर गणपती मंदिराजवळच असलेल्या खड्या चढाईचा बेलाग कातळ असलेला सरसगड किल्ला आहे. साहसी पर्यटकांच्या आकर्षणाचा केंद्रबिंदू असलेला हा गड आपल्या खड्या चढाईच्या कोरीव पायर्‍यांसाठी प्रसिद्ध आहे. त्यामुळे बरेच ट्रेकर व दुर्गप्रेमी येथे येतात. या वेळी ट्रेकिंग पलटन गु्रप पुणेच्या सदस्यांनी पाली गावातून ट्रेक मार्गावरील आणि गड तसेच बालेकिल्ला परिसरातील प्लास्टिक कचरा गोळा केला. 

स्वच्छता मोहिमेत ट्रेकिंग पलटन ग्रुपचे परशुराम भांगरे, हनुमंत लोंढे, श्रीरंग गोरसे, खंडू दयाळ, हेमंत पाटील, कुमार खुंटे, सारोष सातीमन, नितीन बागले, साईनाथ जगदाळे, आकाश शिंदे, सूरज लोंढे, किशोर हांडे, अंकुश धुपाटने, संजय पालकर, डॉ. मिलिंद गायकवाड, प्रा. संदीप चौधरी आणि डॉ. सुरेश इसावे आदी सदस्यांनी सहभाग घेतला होता. ट्रेकिंग पलटन गु्रपचे प्रा. डॉ. सुरेश इसावे यांनी स्वच्छता मोहिमेचे नियोजन, तर प्रा. डॉ. अनिता धायगुडे व प्रा. डॉ. संदीप गाडेकर यांनी त्यांना मदत केली.

– गडावरील सोसाट्याच्या वार्‍यामुळे बराच प्लास्टिक कचरा गडावरून घसरून वा उडून गडाच्या उतारावर आणि पायथ्याच्या परिसरात पडतो. याचा अर्थ हा घातक कचरा गडावरील नव्हे, तर गडाच्या पायथ्याच्या परिसरातील पर्यावरणाला धोकादायक ठरू शकतो. म्हणून सरसगडाला भेट देणार्‍यांनी आपला कचरा गडावर न फेकता सोबत घेऊन जावा आणि गडाचे पावित्र्य व स्वच्छता राखण्यासाठी  मदत करावी, असे आवाहन ट्रेकिंग पलटन ग्रुपने केले आहे.