‘पोस्को’ प्रकरणातील मुलगी बेपत्ता

पनवेल : बातमीदार

पुणे येथील मोटार ट्रान्सपोर्ट विभागातील पोलीस उपमहानिरीक्षक निशिकांत मोरे यांच्यावर दाखल झालेल्या ’पोस्को’ गुन्हा प्रकरणास गंभीर वळण लागले आहे. मोरे यांनी विनयभंग केल्याची तक्रार करणारी अल्पवयीन बालिका घरातून बेपत्ता झाली असून, ’माझा शोध घेऊ नका, माझ्या मृत्यूला निशिकांत मोरे जबाबदार असतील,’ असा मजकूर लिहिलेली चिठ्ठी तिच्या घरी सापडल्यामुळे पालक प्रचंड धास्तावले आहेत. राज्याच्या गृहखात्याच्या अंतर्गत येणार्‍या मोटार ट्रान्सपोर्ट विभागातील निशिकांत मोरे यांच्यावर एका वाढदिवसाच्या पार्टीत निमंत्रण नसतानाही येऊन अल्पवयीन मुलीसोबत अश्लील वर्तन केल्याचा आरोप आहे. मुलीच्या पालकांनी तळोजा पोलीस ठाण्यात वारंवार मागणी केल्यानंतर 26 डिसेंबरला मोरे यांच्यावर ’पोस्को’अंतर्गत गुन्हा दाखल करण्यात आला. सध्या मोरे अटकपूर्व जामिनासाठी न्यायालयत प्रयत्न करत आहेत. या प्रकरणातील पीडित मुलगी सोमवारी रात्री बारा वाजण्याच्या सुमारास घरातून निघून गेली असून मुलीचा शोध घेतल्यानंतरही ती न सापडल्याने मंगळवारी तळोजा पोलीस ठाण्यात तक्रार करण्यात आली. विशेष म्हणजे ’निशिकांत मोरे यांच्यामुळे मला मानसिक धक्का बसला असून, मला कोणीही शोधण्याचा प्रयत्न करू नये. माझ्या आत्महत्येला पोलीस उपमहानिरीक्षक निशिकांत मोरे जबाबदार असतील,’ असा मजकूर लिहिलेली चिठ्ठी मुलीच्या बेडरूममध्ये सापडल्यामुळे खळबळ उडाली आहे. पनवेलचे पोलीस उपायुक्त अशोक दुधे यांनी तळोजा पोलीस ठाण्याला भेट देऊन विविध पथके तयार करून अल्पवयीन मुलीचा तपास सुरू केला आहे. अनुचित घटना घडण्यापूर्वीच आम्ही मुलीला शोधून काढू, असा विश्वास त्यांनी व्यक्त केला आहे.