जैसलमेरमधून पाकमध्ये व्हिडीओ कॉल करणार्या संशयिताला अटक

जैसलमेर : वृत्तसंस्था

राजस्थानच्या जैसलमेरमध्ये पोलिसांनी एका संशयित व्यक्तीला अटक केली आहे. त्याने मोबाईलवरून पाकिस्तानमध्ये व्हिडीओ कॉल केल्याची माहिती समोर आली आहे. जैसलमेर येथील सैन्य तळाच्या आसपास ही व्यक्ती फिरत असताना त्याला पोलिसांनी ताब्यात घेण्यात आले. पुलवामामध्ये झालेल्या दहशतवादी हल्ल्यानंतर भारतीय हवाई दलाने पाकव्याप्त काश्मीरमध्ये घुसून दहशतवाद्यांवर मोठी कारवाई केली. यानंतर संतापलेल्या पाकिस्तानने भारताविरोधात जम्मू-काश्मीरमध्ये कारवाया करण्यास सुरुवात केली आहे. यामुळे दोन्ही देशात तणावाचे वातावरण निर्माण झाले आहे. या पार्श्वभूमीवर राजस्थानमधील प्रकार समोर आला आहे. मिळालेल्या माहितीनुसार, जैसलमेर येथील सोनू या गावाजवळ सैन्याचे प्रशिक्षण केंद्र आहे. याठिकाणी एक व्यक्ती फिरताना दिसली. त्याच्या हालचालीवरून पोलिसांना संशय आला, तसेच त्या व्यक्तीने आपली गाडी उभी करून एक व्हिडीओ कॉल करण्याचा प्रयत्न केला, मात्र त्या वेळी काही लोकांनी त्याला पकडले. पोलिसांनी त्याची चौकशी केली असता, त्याने आपले नाव फतन खान (35) असल्याची माहिती दिली, तसेच सियालो येथील रहिवासी असल्याचे सांगितले. पोलिसांनी संशयित व्यक्तीला अटक केली असून, त्याची कसून चौकशी केली. तसेच त्याच्याकडून एक पेन ड्राईव्ह, कार्ड रिडर आणि एक स्मार्टफोन जप्त करण्यात आला. आपले नातेवाईक पाकिस्तानात राहत असून आपण त्यांना व्हिडीओ कॉल करत असल्याची माहिती फतन खानने दिली. पोलिसांनी त्याचा स्मार्टफोन चेक केला असता 23 फेब्रुवारीला पाकिस्तानात व्हिडीओ कॉल केल्याचे निष्पन्न झाले. फतनने पोलिसांना दिलेल्या माहितीनुसार, त्याचे काही नातेवाईक उमरकोट येथील रहिवासी आहेत. त्यामुळे तो पाकिस्तानात जात असतो. गेल्या दोन आठवड्यात आठ संशयितांना ताब्यात घेण्यात आले आहे.