नीरव मोदीला तत्काळ अटक करा

सीबीआयची मागणी

नवी दिल्ली : वृत्तसंस्था

पंजाब नॅशनल बँकेत 14 हजार कोटी रुपयांचा घोटाळा करून देशाबाहेर पळून गेलेला हिरेव्यापारी नीरव मोदी याला तत्काळ अटक करा, अशी मागणी केंद्रीय गुन्हे अन्वेषण विभागाने (सीबीआय) इंटरपोल आणि ब्रिटनमधील संबंधित संस्थांशी संपर्क साधत केली आहे. मोदी याच्या विरोधात गेल्या वर्षी जुलै महिन्यात रेड कॉर्नर नोटीसही बजावण्यात आली आहे. लंडनमध्ये असलेला नीरव मोदी तेथून कुठेही दुसरीकडे पळून जाऊ नये याची काळजी घ्यावी अशी विनंती सीबीआयने इंटरपोलकडे केली असल्याचे सीबीआयमधील सूत्रांनी माहिती देताना सांगितले. नीरव लंडनमधून अन्य देशांमध्ये पळून जाण्याच्या तयारीत असल्याचीही माहिती हाती आली आहे. तो लंडनमध्येच आहे ही माहिती इंटरपोलने 2018मध्येच दिली होती, मात्र तो नेमका कुठे राहतो हे अनिश्चित आहे, अशी माहिती अधिकार्‍यांनी दिली. नीरव युरोपीय देशांमध्ये सगळीकडे फिरत असतो अशी माहितीही भारतीय संस्थांना मिळाली आहे. यादरम्यान तो भारत, ब्रिटन आणि अमेरिकेत आपल्या विरोधात सुरू असलेल्या प्रक्रियांबाबत तो वकिलांच्या भेटी घेतो, असेही समजले आहे. गेल्या वर्षी मोदीने फ्रान्स, हाँगकाँग, अमेरिका आणि बेल्झियन या देशांमध्ये जाऊन आला आहे. नीरव मोदी लंडनमध्ये नेमका कुठे आहे, हे समजल्यानंतर आता आमचे पुढचे पाऊल त्याला तत्काळ अटक करण्याचे असले पाहिजे असे नाव न सांगण्याच्या अटीवर अधिकार्‍याने सांगितले. त्याने केलेल्या विविध गुन्ह्यांची माहिती ब्रिटन सरकारला प्रत्यर्पणाची मागणी करीत असताना दिली गेली असल्याचेही अधिकारी म्हणाला. नीरवचा भारतीय पासपोर्ट रद्द करण्यात आला आहे. अशा स्थितीत तो कोणत्या कागदपत्रांच्या आधारे देशाबाहेर प्रवास करतो हे ब्रिटन सरकारने पाहिले पाहिजे, असेही अधिकारी म्हणाला. नीरव मोदी अटक केल्यानंतर सीबीआय आणि ईडीच्या संयुक्त टीम लंडनमध्ये रवाना होईल. ही टीम प्रत्यर्पम प्रकरणात काम करेल. जुलैमध्ये नीरवविरुद्ध रेड कॉर्नर नोटीस जारी करण्यात आली आहे, तसेच, त्याच्या विरोधात आंतरराष्ट्रीय अटक वॉरंटही जारी करण्यात आले आहे; तर त्याच्या प्रत्यर्पणाची मागणी गेल्या वर्षी ऑगस्टमध्ये करण्यात आली आहे.