तळोजा पाणीप्रश्न अधिवेशनात

आमदार प्रशांत ठाकूर यांनी वेधले शासनाचे लक्ष

पनवेल : रामप्रहर वृत्त
तळोजा येथील नागरी वसाहत, तसेच औद्योगिक वसाहतीमध्ये नियमित व सुरळीत पाणीपुरवठा होण्याबाबत आमदार प्रशांत ठाकूर यांनी विधिमंडळाच्या अर्थसंकल्पीय अधिवेशनात तारांकित प्रश्न दाखल केला आहे. याद्वारे त्यांनी तळोजातील महत्त्वपूर्ण अशा पाणीप्रश्नावर शासनाचे लक्ष वेधले.
नवी मुंबई सिडको हद्दीतील तळोजा (ता. पनवेल, जि. रायगड) वसाहतीमध्ये अनेक महिन्यांपासून अनियमित व कमी दाबाने पाणीपुरवठा होत असल्याने रहिवाशांना दैनंदिन कामात अनेक अडचणी निर्माण होत असल्याचे डिसेंबर 2019मध्ये निदर्शनास आले आहे. या वसाहतीतील नागरिकांनी अनियमित व कमी दाबाने होत असलेल्या पाणीपुरवठ्याबाबत सिडको प्रशासनाविरोधात मोर्चाही काढला होता, तसेच अनेक गृहनिर्माण संस्थांनी विधानसभा निवडणूकीपूर्वी इमारतीत नो वॉटर नो वोट अशा प्रकारचे फलक लावून संताप व्यक्त केला होता. त्याचबरोबर पाण्याअभावी येथील औद्योगिक वसाहतीमधील अनेक कारखाने बंद पडले. या सर्व प्रकरणाची शासनाने चौकशी करून तळोजा येथील नागरी वसाहती, तसेच औद्योगिक वसाहतीमध्ये नियमित व सुरळीत पाणीपुरवठा होण्याबाबत कोणती उपाययोजना व कार्यवाही केली, असा तारांकित आमदार प्रशांत ठाकूर मुंबईत सुरू असलेल्या अर्थसंकल्पीय अधिवेशनात दाखल केला होता.
या प्रश्नावर राज्याचे नगरविकास मंत्री एकनाथ शिंदे यांनी दिलेल्या लेखी उत्तरात म्हटले आहे की, नवी मुंबई सिडको हद्दीतील तळोजा (ता. पनवेल, जि. रायगड) वसाहतीमध्ये अनेक महिन्यांपासून अनियमित व कमी दाबाने पाणीपुरवठा होत असल्याने रहिवाशांना दैनंदिन कामात अनेक अडचणी निर्माण होत असल्याचे  डिसेंबर 2019मध्ये निदर्शनास आल्याचे आणि पाणीपुरवठ्याबाबत सिडको प्रशासनाविरोधात मोर्चा काढण्यात आल्याची बाब खरी आहे.
नवी मुंबईतील तळोजा रहिवासी वसाहतीला करण्यात येणारा पाणीपुरवठा हा महाराष्ट्र औद्योगिक विकास महामंडळाच्या तळोजा औद्योगिक क्षेत्राच्या पाणीपुरवठा वितरण प्रणालीमधून करण्यात येतो. सद्यस्थितीत तळोजा रहिवासी वसाहतीतील लोकसंख्येला अंदाजे सहा द.ल.ली.प्र.दि. पाणीपुरवठ्याची आवश्यकता आहे. सिडकोच्या निवासी वसाहतीमध्ये वाढ झाल्यामुळे वाढीव आकाराच्या नळजोडणीच्या अनुषंगाने सुमारे आठ द.ल.ली.प्र.दि. पाणीपुरवठाकरिता 400 मि.मी. व्यासाची नळजोडणी मंजूर करण्यात आलेली आहे.
तथापि, राष्ट्रीय हरित लवादाने त्यांचे 3 सप्टेंबर 2019च्या आदेशानुसार संयुक्त सांडपाणी प्रक्रिया केंद्राला (सीईटीपी) औद्योगिक विकास महामंडळाने अंदाजे 30 ते 35 टक्के पाण्याची कपात केल्याने त्याचा परिणाम नागरी वसाहतीच्या पाणीपुरवठ्यावर ही झालेला आहे, तसेच नागरी वसाहतीसाठीचे औद्योगिक वसाहतीतील नळजोडणी ठिकाण ते सिडको निवासी क्षेत्र हे अंतर सुमारे चार ते पाच किमी असल्याने पाणीपुरवठा कमी दाबाने होतो.राष्ट्रीय हरित लवाद यांनी त्यांच्या 3 सप्टेंबर 2019 आदेशान्वये औद्योगिक वसाहतीतील संयुक्त सांडपाणी प्रक्रिया केंद्राला (सीईटीपी) फक्त 10 द.ल.ली.प्र.दि. सांडपाणी घेण्याबाबत मर्यादा घालण्यात आली होती.
यानुसार सांडपाणी निर्माण करणार्‍या कंपन्यांना 6 सप्टेंबर 2019 रोजी पाणीकपातीच्या नोटीसा देऊन 7 सप्टेंबर 2019 ते 24 ऑक्टोबर 2019 या कालावधीत पाणीकपात करण्यात आलेली होती. तळोजा वसाहतींना पुरेसा पाणीपुरवठा उपलब्ध नसल्याने वितरण व्यवस्थेमध्ये बदल करून, तसेच झोनिंग करून दिवसाआड पाणी देण्याचे नियोजन करण्यात आले होते आणि नजीकच्या
खारघर सेक्टर 26 येथील जलकुंभातूनदेखील पाणीपुरवठा करण्यात आला होता. त्यानंतर सर्वोच्च न्यायालयाच्या  21 ऑक्टोबर 2019 रोजीच्या आदेशानुसार औद्योगिक क्षेत्रातील कंपन्यांची पाणीकपात रद्द करून 24 ऑक्टोबर 2019पासून औद्योगिक क्षेत्रातील व नागरी वसाहतीतील पाणीपुरवठा सुरळीतपणे चालू आहे.