निर्भयाच्या दोषीची फाशी टाळण्यासाठी धडपड

नवी दिल्ली : निर्भया सामूहिक बलात्कार आणि हत्या प्रकरणाला आता पुन्हा वेगळे वळण लागले आहे. या प्रकरणातील एक दोषी मुकेशकुमार सिंह याने आपल्या पूर्वीच्या वकिलांवर आरोप करीत सर्वोच्च न्यायालयाचा दरवाजा ठोठावला आहे. पुनर्विचार याचिका दाखल करण्यासाठी तीन वर्षांचा कालावधी असतो, ही माहिती दिली गेली नाही, असा दावा मुकेशने केला आहे. हे लक्षात घेत आता सर्व प्रकारची कार्यवाही रद्द करून पुनर्विचार याचिका आणि इतर कायदेशीर उपचारांचा वापर करण्याची आपल्याला परवानगी द्यावी, अशी मागणी मुकेशने सुप्रीम कोर्टाकडे केली आहे. आता मुकेशने आपले नवे वकील एम. एल. शर्मा यांच्याद्वारे ही नवी याचिका दाखल केली आहे. त्यामुळे आता कोर्टाच्या भूमिकेकडे सर्वांचे लक्ष लागले आहे.