पोलिसांसाठी सॅनिटायझरचे वाटप

पनवेल : क्रांतिज्योत महिला विकास फाऊंडेशनच्या वतीने पनवेल येथील खांदेश्वर पोलीस स्टेशन, कामोठे पोलीस स्टेशन, कळंबोली पोलीस स्टेशन तसेच आसूडगाव वाहतूक शाखा चौकी, कळंबोली वाहतूक शाखा चौकी व मॅकडोनाल्डजवळील बंदोबस्त करीत असलेले अधिकारी व कर्मचार्‍यांना सॅनिटायझरचे फाऊंडेशनच्या अध्यक्षा रुपाली शिंदे, निकेशा केमिकल्स प्रा. लि.चे प्रोप्राईटर मृगेश दोषी यांनी वाटप केले. या वेळी पोलीस अधिकारी उपस्थित होते.

आदिवासींना सात टन धान्यवाटप

पनवेल : आदिवासी समाजाला मदत म्हणून जीवनावश्यक वस्तू देण्याचे आवाहन युसूफ मेहेरअली सेंटरचे सामाजिक कार्यकर्ते संतोष ठाकूर व पत्रकार लक्ष्मण ठाकूर यांनी फेसबुक आणि व्हॉट्सअ‍ॅपच्या माध्यमातून केले होते. या आवाहनाला तत्काळ प्रतिसाद देत खारघर येथील शाश्वत फाऊंडेशनच्या अध्यक्षा बिना गोगरी, सदस्य जयेश गोगरी, ग्रामसंवर्धन सामाजिक संस्थेचे कार्यकर्ते चारुदत्त पाटील, नवी मुंबई पोलीस आयुक्त रवींद्र गिड्डे, एकता सामाजिक संस्था कामोठे, भारत रक्षा मंच व इतर देणगीदारांनी सात टन (704 किलो) धान्य व इतर साहित्य जमा केले. कर्नाळा, तारा, आपटा, बारापाडा, चावणे भागातील 654 आदिवासी कुटुंबाना बानुबाईवाडी, भोकरवाडी, हाडंबावाडी, बामण डुंगी, लहुचीवाडी आखाडावाडी, विठ्ठलवाडी, खैराटवाडी, घेरावाडी, सारसई येथील दोन धनगरवाड्या, खालची टपोरवाडी, वरचीवाडी, वडमाळ, खैरास अशा 16 आदिवासी वाड्या व आपटा गावांतील 654 कुटुंबांना मदतीचा हात दिला आहे.

श्रीराम जन्मोत्सव घरीच साजरा

उरण : उरण शहरातील गणपती चौकजवळील शंभर ते सव्वाचे वर्षांपूर्वीच्या श्रीराम मंदिरात दरवर्षी श्रीराम मंदिर ट्रस्ट उरण यांच्या वतीने श्रीराम जन्मोत्सव साजरा केला जातो. परंतु श्रीराम मंदिराच्या जीर्णोद्धाराचे काम सुरु असल्याने व कोरोना संसर्ग प्रसार होऊ नये त्यामुळे यंदा श्रीराम मंदिर ट्रस्ट उरणचे ट्रस्टी चंद्रकांत भाईचंद ठक्कर यांच्या घरी सोशल डिस्टन्सिंग ठेवून व सरकारी नियमांचे पालन करून श्रीराम जन्मोत्सव साजरा केला.