पनवेलमध्ये ऑनलाइन मद्यविक्रीत अनेकांची फसवणूक

पनवेल : प्रतिनिधी

पनवेल महापालिका क्षेत्रात ऑनलाइन मद्य विक्रीमुळे अनेक मद्यप्रेमी पाहिल्याच दिवशी हजारो रुपयांना फसवले गेल्याचे पाहायला मिळाले. महापालिका आयुक्त गणेश देशमुख यांनी ऑन लाइन मद्यविक्रीला परवानगी देणारा आदेश मंगळवारी दिले. त्यामुळे लॉकडाऊनमध्ये घसा कोरडा पडलेल्या अनेक मद्य प्रेमींना आनंद झाला आहे. पण बुधवारी अनेकांना पैसे भरून ही मद्य न मिळाल्याने त्यांचा आनंद लगेच मावळला.

राज्यात मद्य विक्रीची दुकाने उघडण्यास परवानगी देण्यात आल्या नंतर ही पनवेल महापालिका क्षेत्रात रेड झोन असल्याने दुकाने उघडण्यास बंदी घालण्यात आली होती. पनवेल महापालिका आयुक्तांनी महापालिका क्षेत्रात  कंटेन्मेंट झोन वगळून सायंकाळी  5 वाजेपर्यंत काउन्टर विक्री न करता ऑनलाइन सीलबंद मद्य  विक्रीला परवानगी दिल्याचा आदेश काढला आहे. यासाठी विक्रेत्याने मद्य घरपोच पुरवठा करण्यासाठी मनुष्यबळ ठेवावे. डिलिव्हरी बॉयला मास्क, ग्लोव्हज सक्तीचे आहेत. कामगारांना फोटोसह ओळखपत्र आवश्यक असेल. त्यांची थर्मल स्कॅनिंग करणे आवश्यक असेल परवानाधारकाला आपली मागणी व्हॉट्सअ‍ॅप, मोबाइल किवा लघु संदेशाद्वारे नोंदवावी, अशा अटी घातल्या होत्या. या अटी पूर्ण करणे शक्य नसल्याचे सांगून मद्य विक्रेत्यांनी विक्री सुरू केली नव्हती. पण याचा फायदा घेऊन भामट्यांनी मात्र मद्य प्रेमींना चांगलाच गंडा घातल्याचे समोर आले. बुधवारी सकाळी दरबार वाईन समोर दोघे जण आले होते. त्यांनी ऑनलाइन दोन हजार रुपये भरल्यावर तुमचे पार्सल तयार आहे. तुम्ही जीएसटीचे पैसे पाठवलेला क्यूआर कोड स्कॅन करून भरलेत की पाठवतो, असे सांगण्यात आले. त्यांनी क्यूआर कोड स्कॅन न करता रोख पैसे देतो सांगितल्यावर त्यांना एका वाईन शॉपमध्ये या आणि पार्सल घेऊन जा असे सांगितल्याने ते आले असता तेथे वॉचमन शिवाय कोणीच नव्हते. तो फोन नंबर ही बंद येत होता हे पाहिल्यावर आपण फसवले गेल्याचे त्यांच्या लक्षात आले. शहरात अशाप्रकारे अनेक जण फसवले गेले असल्याची चर्चा असून त्यांनी अद्याप पोलिसांकडे तक्रार न केल्याने फसवणुकीचा आकडा मोठा असण्याची शक्यता आहे.