पनवेल महापालिका हद्दीत कोरोना रुग्ण बरे होण्याचेही प्रमाण जास्त

पनवेल : बातमीदार

पनवेल महानगरपालिका क्षेत्रातील उपजिल्हा रुग्णालयात मागील 87 दिवसांत कोरोना उपचारासाठी दाखल झालेल्या 456 रुग्णांपैकी एकही रुग्ण दगावलेला नाही. यातील 364 रुग्ण ठणठणीत बरे होऊन घरी परतले आहेत. तर 46 रुग्णांवर उपचार सुरू आहेत. आरोग्य योद्ध्यांमुळे कोरोनावर मात करण्यात यश आल्याचे स्पष्ट झाले आहे.

पनवेल पालिका क्षेत्रात 45 जणांचा मृत्यू झाला आहे. मृत्यूचा दर देश व राज्यापेक्षा जास्त आहे. सध्या पालिका क्षेत्रातील इंडियाबुल येथील विलगीकरण कक्षात 162 संशयित रुग्ण, तर अतिदक्षता विभागात दाखल करण्याची गरज असलेल्या 116 रुग्णांना एमजीएम रुग्णालयात दाखल करण्यात आले आहे. उपजिल्हा रुग्णालयात आतापर्यंत अतिदक्षता विभाग सुरू झालेला नाही. सध्या कामोठेतील येथील धर्मादाय तत्त्वावर चालणारे खासगी एमजीएम रुग्णालयाच्या अतिदक्षता विभागात रुग्णांना दाखल केले जात आहे. मृत्यूदर वाढीबाबत एमजीएम रुग्णालय संचालकांनी रुग्णाची प्रकृती चिंताजनक झाल्यानंतर त्यांना उपचारासाठी येथे आणले जात असल्याचे सांगितले. पालिका हद्दीत मृत्यू झालेल्यांमध्ये 45 हून अधिक वय असलेल्या व्यक्तींचा समावेश आहे.

दहा तज्ज्ञ डॉक्टरांची एक समिती मृत्यूदर रोखण्यासाठी उपाययोजना अमलात आणीत आहे. मृत्यूदर जास्त असला तरी उपचार घेऊन बरे होणार्‍यांचे प्रमाण पनवेलमध्ये सर्वाधिक आहे, असे पनवेल महापालिका आयुक्त सुधाकर देशमुख यांनी सांगितले.

      वय                बरे झालेले रुग्ण

0 ते 14 वर्षे वय              44

15 ते 30 वर्षे                119

31 ते 40 वर्षे                128

41 ते 50 वर्षे                69

51 ते 60 वर्षे                65

60 वर्षांवरील                 26

 एकूण                        451

ठणठणीत बरेपालिका क्षेत्रात आजवर 1016 पैकी 709 रुग्ण बरे होऊन घरी परतले आहेत. पालिका हद्दीत रुग्ण बरे होण्याचे प्रमाण 69.78 टक्के आहे. हा दर राज्य आणि देशाच्या दरापेक्षा अधिक आहे. देशाचा करोनाग्रस्त बरे होण्याचा दर 52.37 टक्के तर राज्याचे प्रमाण 50.61 टक्के आहे.