रायगडात 102 नवे पॉझिटिव्ह रुग्ण; तिघांचा मृत्यू

पनवेल : रायगड जिल्ह्यात सोमवारी (दि. 22) सलग चौथ्या दिवशी कोरोना रुग्णांच्या संख्येने शंभरी पार केली. जिल्ह्यात 102 नव्या रुग्णांची नोंद झाली असून, तीन जण मृत्युमुखी पडले आहेत. दिवसभरात पनवेल महापालिका हद्दीत 53, पनवेल ग्रामीण आणि कर्जत तालुक्यात प्रत्येकी 20, उरण तालुक्यात तीन, पेण व महाड तालुक्यात प्रत्येकी दोन, तर मुरूड व माणगाव तालुक्यात प्रत्येकी एक रुग्ण आढळला. मृतांमध्ये पनवेल महापालिका हद्दीतील दोन आणि कर्जत तालुक्यातील एक अशा तिघांचा समावेश आहे. नव्या रुग्णांमुळे जिल्ह्यातील कोरोनाबाधितांचा एकूण आकडा 2520 झाला असून, बळींचे शतक होऊन ही संख्या 101 झाली आहे. ‘अनलॉक’नंतर रुग्ण व मृतांचा आकडा वाढताना दिसत आहे.