तळोजा परिसरात इमारतीला आग

बालकासह परिवाराचे जवानांनी वाचवले प्राण

पनवेल : वार्ताहर

तळोजा येथील एका इमारतीत रविवारी (दि. 19) लागलेल्या आगीत नऊ महिन्यांच्या बालकासह त्याचा परिवार जवळपास एक तास आत अडकला होता. आगीची माहिती मिळताच घटनास्थळी पोहोचलेल्या अग्निशमन दलाच्या जवानांनी शर्थीचे प्रयत्न करून त्यांना सुखरूपपणे बाहेर काढले.

तळोजा फेज-1 से.-11 येथे एके प्लाझा या इमारतीच्या सातव्या मजल्यावर शॉर्टसर्किटमुळे आग लागली होती. त्यामुळे संपूर्ण इमारत धुराच्या लोटांनी भरली होती. खालच्या मजल्यावरील सर्व रहिवाशांनी तत्काळ इमारत खाली केली. परंतु नवव्या मजल्यावर राहणार्‍या नऊ महिन्यांच्या बालकासह त्याचा परिवार यात अडकून पडला होता. घटनास्थळी पोहचलेल्या अग्निशमन दलाच्या जवानांनी संकटकाळी बाहेर पडण्याचे मार्ग मोकळे करून आगीवर नियंत्रण मिळवले व या परिवाराला एक तासांच्या शर्थीच्या प्रयत्नानंतर बाहेर काढले.