गणेशमूर्तिकारांसमोर अडचणींचा डोंगर

पनवेल : बातमीदार

एरवी या मोसमात गणेशमूर्तींवर शेवटचा हात फिरवण्यात व्यग्र असणार्‍या मूर्तिकारांसमोर यंदा अडचणींचा डोंगर उभा राहिला आहे. लॉकडाऊनमुळे गणेशोत्सव साजरा करण्यावर अनेक निर्बंध आले. मात्र मूर्तींच्या उंचीबाबत स्पष्टता वेळीच न आल्याने मूर्तिकारांनी आपल्या पद्धतीने मूर्ती साकारल्या. त्यामुळे नियमांच्या चौकटी पलीकडील उंच मूर्तींबाबत काय करायचे, असा प्रश्न मूर्तिकारांसमोर उभा ठाकला आहे. शिवाय हॉटस्पॉट भागातील दुकाने सुरू न झाल्याने आहेत त्या गणेशमूर्ती विक्रीसही ठेवता येत नाहीत. परिणामी गणेश कारखान्यांमध्येच या मूर्ती झाकून ठेवण्याची वेळ मूर्तिकारांसमोर आली आहे.

नवी मुंबईत काही निवडक गणेशमूर्तींचे कारखाने आहेत. तिथे वर्षभर मूर्ती साकारण्याचे काम केले जाते. तर काही असेही व्यावसायिक आहेत जे पेण तालुक्यातून गणेशमूर्ती आणून त्यांची विक्री करतात. या दोन्ही प्रकारच्या मूर्तिकारांना मूर्ती विकण्यासाठी जागेची गरज भासते. एखाद्या मोकळ्या ठिकाणी मंडप उभारून किंवा सोसायटीच्या आवारात मंडप उभारून गणेशमूर्ती प्रदर्शनात ठेवल्या जातात. मात्र या वर्षी असे प्रदर्शन करण्यासाठी महापालिकेकडून परवानगी मिळत नसल्याने मूर्तिकारांनी अडचण वाढली आहे.

याचबरोबर मूर्तींच्या उंचीबाबत आता स्पष्टता करण्यात आली आहे. त्यानुसार सार्वजनिक मंडळांची गणेशमूर्ती चार फूट आणि घरगुती गणेशमूर्ती दोन फूट असावी. मात्र मूर्ती साकारण्याचे काम तर आधीपासूनच सुरू असते. आता फक्त मूर्तींवर शेवटचा हात फिरवला जातो. अनेक मूर्तिकारांनी सार्वजनिक मंडळांसाठी त्यांच्या मागणीनुसार सहा फूटांपर्यंत गणेशमूर्ती आधीपासूनच साकारल्या आहेत. तर अनेक घरगुती गणेशमूर्तीही अडीच ते तीन फूट उंचीच्या आहेत. उंचीच्या मर्यादेमुळे या मूर्तींचे काय करायचे, असा प्रश्न अनेक मूर्तिकारांपुढे उभा राहिला आहे. आता पुढे वर्षभर या मूर्ती सांभाळाव्या लागणार असल्याचे मूर्तिकार सांगत आहेत.

मार्ग काढण्याचा प्रयत्न

हातावर हात ठेवून काही करता येणार नाही. त्यामुळे गणेशमूर्तींचे फोटो काढून, व्हिडीओ शूटिंग करून गणेश भक्तांना पाठवत आहोत आणि त्याद्वारे बुकिंग करायला सांगत आहोत, अशी माहिती गणेश मूर्तिकार मालक कारखानदार संघटनेचे अध्यक्ष सुनील मोरे यांनी दिली. गणेशोत्सव दहा दिवसांचा असला तरी मूर्तिकार वर्षभर त्यासाठी कष्ट करत असतो आणि मूर्ती साकारत असतो. यावर्षी कोरोनामुळे हे सर्व मूर्तिकार अडचणीत आहेत. वर्षभराची मेहनत यामुळे वाया जाण्याची वेळ आली आहे. आता जो काही वेळ हातात आहे, त्यातून काम करण्याचा प्रयत्न करत आहोत, असेही त्यांनी सांगितले.